Tags-Rang

ye kaise din haiñ hamārī zamīn par 'sarvat'
guloñ kā rañg namak kā mazā badalne lagā

hotā kabhī habīb jo bantā raqīb hai
qismat ke rañg dekhte rah jā.iye zarā

kis ko ḳhabar maiñ kis raste kī dhuul banūñ yā phuul banūñ
kyā jaane kyā rañg dikhā.e us kī aañkh pahelī sī

jab maiñ nasheb-o-rañg-o-bū meñ utrā us kī yaad ke saath
os meñ bhīgī dhuup lagī hai narm harī lachkīlī sī

hā-o-hū kī duniyā meñ mā-o-tū kī duniyā meñ
rañg o bū kī duniyā meñ sādgī kahāñ jaa.e

maiñ ek rañg thā rañg-e-ḳhayāl-e-āvāra
kisī dhanak meñ kisī rut ke pairahan meñ rahā

gul dil-e-ġhuncha naman tañg ho rañg-o-bū siiñ
jab kare yaad tire lab ke ta.iiñ dhyān meñ aa

dam-e-barq-o-bād hotā nafas-e-sharār hotā
kisī rañg se to jiinā mujhe sāzgār hotā

do roz ek vaz.a pe rañg-e-jahāñ nahīñ
vo kaun sā chaman hai ki jis ko ḳhizāñ nahīñ

sau rañg jalvagar haiñ garche butān-e-ālam
ham ek tujhi ko apnā manzūr jānte haiñ

badal rahe haiñ zamāne ke rañg kyā kyā dekh
nazar uThā ki ye duniyā hai dekhne ke liye

tū mayassar thā to dil meñ the hazāroñ armāñ
tū nahīñ hai to har ik samt ajab rañg-e-malāl

koī rañg to do mire chehre ko
phir zaḳhm agar mahkāo to kyā

rañg-e-vahshat kam nahīñ zaḳhm-e-tamāshā kam nahīñ
zinda rahne ke liye āshob-e-duniyā kam nahīñ

qissa-e-dār-o-rasan yā qissa-e-gesū-o-qad
kuchh to chheḌo vaqt bhī hai rañg par mahfil bhī hai

zamīñ pe phir kahīñ vahshat ne sar ubhārā hai
lahū ke rañg meñ phir aaj āsmāñ dekhūñ

sub.h uTh kar āñsuoñ se ḳhuun ke rotā huuñ maiñ
dil ke naqshe meñ vafā kā rañg bharne ke liye

lafz kī shakl par na jā lafz ke rañg bhī samajh
ek ḳhabar pas-e-ḳhabar aaj kī har ḳhabar meñ thī

gul-e-ḳhush-numā ke libās meñ ki shuā-e-nūr meñ Dhal ke aa
tujhe DhūñDh legī mirī nazar tū hazār rañg badal ke aa