Tags-Rang

gul-o-ġhuncha ki rañg-o-bū meñ pā letā huuñ sab un meñ
khile haiñ is tarah dāġh-e-jigar āhista āhista

ham ki shā.ir haiñ dil ko ḳhuuñ kar ke
apne gītoñ meñ rañg bharte haiñ

gah gul hai gaah rañg gahe baaġh kī hai bū
aatā nahīñ nazar vo tarah-dār ek tarah

rañg badaltī is duniyā meñ sab kuchh badal gayā lekin
mere laboñ par terā fasāna pahle bhī thā aaj bhī hai

shām-e-sad-rañg mire ā.ina-ḳhāne meñ Thahar
maiñ ne tasvīr banānī hai tire ġhāze se

ghuT ke rah saktī thī kab tak ātish-e-rañg-e-bahār
zarb-e-mausam bhī kuchh aisī thī ki sab gulshan jalā

ye kaisī añgḌā.ī lī hai ehsās-e-zindagī ne
masīh kā rañg rū-e-bīmār par khilā hai

bahār aa.ī bhī 'ḳhāvar' to kyā bahār aa.ī
chaman ke phuul to mahrūm-e-rañg-o-bū hī rahe

ḳhūn-e-nāhaq hamārā uchhlegā
rañg laayā jo shoḳh holī meñ

kyuuñ raushnī-o-rañg se ma.amūr na ho dil
sunsān sahī ā.ina-ḳhāna hai tumhārā

rañg-dar-rañg hijābāt uThāne hoñge
be-mahābā hameñ sab jalve dikhāne hoñge

jo guloñ ne chehre pe mal liyā jo kalī ne maañg meñ bhar liyā
vo ghaḌī bhī aa.egī dekhnā yahī rañg ḳhūn-e-bahār he

haiñ jigar meñ daaġh lahū hai dil haiñ tar āñkheñ siina figār hai
yahī rañg-o-bū yahī fasl-e-gul yahī be-kasoñ kī bahār hai

ḳhud rafta ho badmast ho kaisā hai mizāj
kal aap kī kyā vaz.a thī kyā rañg hai aaj

mutma.in ho dekh kar tum rañg-e-tasvīr-e-hayāt
phir vo shāyad vo nahīñ jo mujh ko dikhlā.ī ga.ī

tujhe dekhne vaale yuuñ to bahut haiñ
magar ham ba-rañg-e-digar dekhte haiñ

nashsha-e-rañg se hai vāshud-e-gul
mast kab band-e-qabā bāñdhte haiñ

is tilism-e-rañg-o-bū ke sehr se nikle haiñ jab
ham ko aksar din meñ bhī taare nazar aane lage

mah-ruḳhoñ kī bazm meñ shirkat nazar aane lagī
aur tasavvur meñ dhanak ke rañg lahrāne lage

kyā ḳhabar jis kā yahāñ itnā uḌāte haiñ mazāq
ḳhud hameñ bhī kabhī is rañg meñ Dhalnā paḌ jaa.e