Tags-Rang

pilā rahā huuñ maiñ kāñToñ ko ḳhūn-e-dil ai 'shād'
guloñ ke rañg uḌāne kī baat kartā huuñ

utar ā.ūñgā maiñ bhī zīna-e-hastī se yuuñ ik din
ki jaise rañg-e-ruḳh utre hai nādārī ke mausam meñ

qatl ke ba.ad bhī ik aish kā sāmāñ hogā
mai-e-gul-rañg lahū zaḳhm namak-dāñ hogā

har taraf rañg-o-nūr hai phir bhī
shahr kyuuñ kar udaas rahtā hai

ye rañg-o-nasl aur tashaddud ke silsile
dushman kī rāhatoñ ke sivā aur kuchh nahīñ

vo ek jism vahī kau.dtā lapaktā jism
ki jis ke rañg kī nisbat se jogiyā huuñ maiñ

dil ke sab daaġh khile haiñ gul-e-ḳhandāñ ho kar
rañg laayā hai ye ġhuncha chamanistāñ ho kar

rañg hī chehre pe lahrāte haiñ ab
jāñ-kanī aisī bhī hotī hai bhalā

tapte hue sahrā meñ jaise shabnam kī be-rañg numūd
jaane kitne ḳhat likkhe haiñ maiñ ne bhī barsāt ke naam

koī tasvīr banā le ki tujhe yaad raheñ
tez chaltī hai havā rañg uḌe jaate haiñ

dil ke kahne se abas us kī tamannā kī thī
hasrat-e-rañg-e-bahārāñ na tujhe hai na mujhe

ajab ḳhvāb āshnā āñkheñ huī haiñ vasl kī shab
khulī hai aañkh to rañg-e-sahar kitnā hasīñ hai

bharūñ maiñ rañg na.e muzmahil tamannā meñ
udaas raat ko āsūda-e-bahār karūñ

tujh se bichhḌe haiñ to ab kis se milātī hai hameñ
zindagī dekhiye kyā rañg dikhātī hai hameñ

har rañg hamārā hai, har ik rañg meñ ham haiñ
tasvīr hue vaqt kī raftār meñ ham log

'zulfī' kalī kalī meñ machaltā nayā lahū
aatā vo sail-e-rañg ki gulzār bolte

begāna dekhtā huuñ maiñ har gul kā rañg-o-bū
ham-dāġh is chaman meñ agar hai to laala hai

chāñd us raat bhī niklā thā magar us kā vajūd
itnā ḳhūñ-rañg thā jaise kisī ma.asūm kī laash

din bhar jo sūraj ke Dar se galiyoñ meñ chhup rahte haiñ
shaam aate hī āñkhoñ meñ vo rañg purāne aa jaate haiñ