Tags-Rang

nuqūsh-e-dard tarāshe ġhamoñ ke rañg bhare
maiñ jaise dast-e-mashiyyat meñ koī patthar thā

jab bhī lahū meñ rañg-e-ḳhizāñ kī saḳhtī baḌhne lag jaatī hai
chand lab o ruḳhsār bulā kar jashn-e-bahārī kar lete haiñ

gulshanoñ meñ ye rañg-rūp kahā
lā-javāb ai nigār kyā kahnā

mujh ko tahzīb ke maktab ne sikhāyā hai yahī
taḳhtī-e-dil na paḌhūñ rañg-e-qabā ko dekhūñ

rañg sab dhuñdlā ga.e haiñ sab lakīreñ miT ga.iiñ
aks hai be-pairahan us paikar-e-nāyāb kā

kisī kī ḳhush-rañg guftugū kī miThās sheroñ meñ Dhal ga.ī hai
hamārī āñkhoñ ke ḳhvāb-dāñ se tumhārī sūrat nikal ga.ī hai

vo kabhī sur hai kabhī rañg 'amjad'
us ko kis naam se DhūñDā jaa.e

tark-e-vafā ke ba.ad milā to jab ma.alūm huā
is meñ kitne rañg the us ke kaun hamārā thā

ye nisbat ishq kī be-rañg laa.e rah nahīñ saktī
jo mahbūb-e-ḳhudā kā hai vo mahbūb-e-ḳhudā hogā

rañg-o-nik.hat ke ḳhazāne bhī zamīñ-bos hue
chal ke ḳhud aane lagī ḳhushbū ḳharīdār ke paas

hazār sher haiñ aur ek ḳhāmushī kī adā
hazār rañg haiñ aur ek sādgī kī tarah

abr ko dekhā jo saaqī ne nigāh-e-mast se
ra.ad bolā ab mai-e-gul-rañg barsātā huuñ maiñ

ho ba-sad-rañg shagufta lab-e-dariyā pe vo baaġh
har ravish jis meñ ki bas lutf-e-hazār aa.e nazar

rañg-e-gulzār jahāñ garche hazār aa.e nazar
chain par dil ko kahāñ taaki na yaar aa.e nazar

zardiyāñ haiñ mire chehre pe 'zafar' us ghar kī
us ne āḳhir mujhe rañg-e-dar-o-dīvār diyā

bichhaḌte vaqt udāsī kā rañg thā jin par
nazar ne bose bahut aise bām-o-dar ke liye

fursat-e-ārām-e-ġhash hastī hai bohrān-e-adam
hai shikast-e-rañg-e-imkāñ gardish-e-pahlū mujhe

ga.e vo din jab ki is chaman meñ havā-e-nashv-o-numā thī ham ko
ḳhizāñ ko dekhā nahīñ hai ham ne ki ḳhvāhish-e-rañg-o-bū kareñge

maiñ musavvir huuñ magar tasvīr hai ḳhāliq mirī
rañg bhartī hai mire ḳhāke meñ merī aarzū

zard thā chehra magar masrūr thā pahlū meñ dil
barg-e-gul jab le uḌā chupke se merā rañg-o-bū