Tags-Rang

ik husn-e-be-misāl kī tamsīl ke liye
parchhā.iyoñ pe rañg girātā rahā huuñ maiñ

ruḳh pe ahbāb ke phir rañg-e-musarrat aa.e
phir mirī samt koī sañg-e-malāmat aa.e

kis shai pe abhī ham jashn kareñ har-sū kāñTe kūḌā-karkaT
kuchh rañg-e-chaman aa.e to sahī ghūre pe charāġhāñ kyā hogā

zindagī tū ne ka.ī rañg bhare haiñ paiham
zulf-e-shab-rañg kabhī rañg-e-hinā ho jaanā

jāñ-gusil vaqt kī tasvīr adhūrī rakh dī
ham ne chāhā nahīñ har rañg kā vā ho jaanā

insān kī sūrat meñ ka.ī rañg ke patthar
ham siine pe rakkhe hue ḳhvābīda rahe haiñ

Dhalā hai husn lekin rañg hai ruḳhsār-e-jānāñ par
abhī baaqī hai kuchh kuchh dhuup dīvār-e-gulistāñ par

donoñ vaqt milte haiñ do diloñ kī sūrat se
āsmāñ ne ḳhush ho kar rañg sā bikherā hai

ghaḌī bhar rañg nikhrā sūrat-e-gul-hā-e-tar merā
usī hastī pe us gulshan meñ thā ye shor-o-shar merā

qadr-e-vafā bhī hogī kisī din jafā ke ba.ad
lā.egā rañg-e-ḳhūn-e-shahīdāñ hinā ke ba.ad

har ek rañg meñ yuuñ Duub kar nikharte rahe
ḳhutūt naqsh-e-musavvir meñ rañg bharte rahe

shab bhar havā ke rañg badalte rahe na.e
maiñ dekhtā rahā safar-e-bar-shaġhāl ko

ham-rañg-e-māhtāb thā vo is meñ kho gayā
ab kitnī duur pheñkiye nazroñ ke jaal ko

'shakīl' ehsās hai mujh ko har ik mauzūñ tabī.at kā
ġhazal paḌhne se pahle rañg-e-mahfil dekh letā huuñ

har rañg zindagī hai tah-e-gard-o-rozgār
tasvīr kī vo raunaq-o-ra.anā.ī kam huī

rañg-e-shafaq sabze kā nasha kuchh nahīñ āñkhoñ meñ
duur ḳhalā meñ dekh rahā huuñ manzar-vanzar kyā

is ta.alluq kā koī rañg na Dhalne paayā
tazkira sheroñ meñ ab bhī usī gulfām kā hai

kyā mai-e-gul-gūñ se raunaq ghaT ga.ī
rañg balki aa gayā īmān meñ

kisī se rañg-e-ufuq hī kī baat kar lete
ab is qadar bhī yahāñ mo'tabar na thā koī