Tags-Rang

us shaḳhs se 'shamīm' kā rishta ajiib thā
kuchh dushmanī kā rañg thā kuchh dostī sī thī

paanī ke intizār meñ ḳhālī ghaḌe ke paas
kuchh shoḳh shoḳh rañg the kuchh dilkashī sī thī

ye sach hai rañg badaltā thā vo har ik lamha
magar vahī to bahut kāmyāb chehrā thā

sahar kī lau meñ jalā rahī hai sabā kañval rañg-o-bū meñ tar haiñ
daraḳht saare sajā.e motī kī thāliyāñ saf-ba-saf khaḌe haiñ

rañg bāzār-e-ḳhirad kā aur ye merā junūñ
ik sitāra gumbad-e-aflāk par ḳhvāboñ kā hai

sachchā.ī ke rañg havā meñ phail ga.e
chunarī ko lahrāo mausam achchhā hai

us ne kahā ki yaad haiñ rañg tulū-e-ishq ke
maiñ ne kahā ki chhoḌiye ab unheñ bhuul jā.iye

kis lagan kis tamannā se kis chaav se mausam-e-rañg-o-nik.hat ko dī thī sadā
kyā ḳhabar thī ki abr-e-bahār-āfrīñ aag ke phuul gulshan pe barsā.egā

tere ġham ke charāġhoñ kī sad-rañg zau ik kiran de sakegī na ehsās ko
bazm-e-jāñ itnī sunsān ho jā.egī shahr-e-dil itnā vīrān ho jā.egā

niile piile siyāh surḳh safed sab the shāmil isī tamāshe meñ
yūrish-e-rañg ne zalīl kiyā aañkh gum ho ga.ī tamāshe meñ

sāġhar-e-gul se hazāroñ rañg uchhalte haiñ tire
ism-e-āzam sabz lauhoñ par chamaktā hai tirā

rañg ukhaḌ jaa.e to zāhir ho plastar kī namī
qahqaha khod ke dekho to tumheñ aah mile

aur bad-rañg sī chādar pe vo baiThā huā shaḳhs
ḳhvāb meñ boltā jaatā thā siyah baasī lafz

yaad hai un kī ki ik muaj-e-jamāl-o-rañg-o-bū
sham.eñ kaliyoñ kī sī us dil meñ farozāñ ho ga.iiñ

tirī bazm-e-ḳhud-ġharaz ne ka.ī rañg badle lekin
maiñ harīf-e-sham.a ban kar usī tarah jal rahā huuñ

ajab bahār dikhā.ī lahū ke chhīñToñ ne
ḳhizāñ kā rañg bhī rañg-e-bahār jaisā thā

rañgīnī-e-bahār ke ham muntazir haiñ kyuuñ
bād-e-ḳhizāñ ne rañg-e-gulistāñ uḌā diyā

har rañg se payām utarte haiñ ruuh meñ
paḌtī hai jab nigāh dhanak ke jhukāv par

nahīñ sab ke saath yaksāñ safar-e-hayāt pyāre
kahīñ rañg-o-bū ke saa.e kahīñ dasht-e-pur-mehan hai

ye kaisā ḳhuuñ hai ki bah rahā hai na jam rahā hai
ye rañg dekhūñ ki dil jigar kā fishār dekhūñ