Tags-Rang

yahī ḳhāmoshī ka.ī rañg meñ zāhir hogī
aur kuchh roz ki vo shoḳh khulā chāhtā hai

ye kaise rañg utre haiñ jinheñ dekhā nahīñ jaatā
ye kaisī sub.h phūTī hai jo kaalī hotī jaatī hai

rañg-e-mahfil chāhtā hai ik mukammal inqalāb
chand sham.oñ ke bhaḌakne se sahar hotī nahīñ

harf-e-zehn meñ 'bedī' rañg se tahī kab haiñ
sirf terā kāġhaz hai jo abhī hai saada likh

maiñ jis ko sochtā rahtā huuñ rāt-din 'ahmad'
usī ne rañg bhare haiñ mirī nigārish meñ

khile haiñ phuul usī rañg kī satā.ish meñ
jo be-misāl rahā aap apnī tābish meñ

in meñ tirā hī rañg hai in meñ tirā hī ruup hai
phūloñ kī kyā misāl duuñ terī misāl ke baġhair

ḳhushbū-e-dard ke baġhair rañg-e-jamāl ke baġhair
kaise guzar ga.ī hayāt hijr-o-visāl ke baġhair

dard kā dil kā shaam kā bazm kā mai kā jaam kā
rañg badal badal gayā ek nazar ke saath saath

kis rañg meñ vo rahte haiñ us kī ḳhabar nahīñ
mahfil meñ in kī aaj maiñ pahle-pahal gayā

vo agar burā na māneñ to jahān-e-rañg-o-bū meñ
maiñ sukūn-e-dil kī ḳhātir koī DhūñD luuñ sahārā

kahīñ ye ḳhvāb sī tasvīr bol uTThī to
ḳhayāl aayā musavvir ko rañg bharte hue

vo ḳhaak samjheñge rāz-e-gul-o-saman 'tābāñ'
jo rañg-o-bū ko fareb-e-nazar samajhte haiñ

mil gayā thā baaġh meñ ma.ashūq ik nak-dār sā
rañg o rū meñ phuul kī mānind saj meñ ḳhaar sā

faiz thā us ke tasavvur kā jo chashm-e-tar tak
qāfile rañg ke khiñch aa.e hamāre ghar tak

vo itr tirī kākul-e-shab-rañg ne chhiḌkā
mahkī hai ḳhirad ruuh kalī ban ke khilī hai

lauT kar aa ke dekhā to phūloñ kā rañg
jo kabhī surḳh thā zard hī zard hai

kaan meñ motī haath meñ kañgan phuul chamelī kā juuḌe meñ
kyā kyā rañg jamāne vaale āñkheñ jin se basīñ, milte haiñ

mujh ko na le chal bād-e-bahārī rañg-e-chaman hai vahshat-ḳhez
jeb se le kar dāman tak sau TukḌe kartā phūloñ kā