Tags-Rang

gul hue chāk-garebāñ sar-e-gulzār ai dil
ban gayā rañg-e-chaman bā.is-e-āzār ai dil

ye rañg rañg parinde hī ham se achchhe haiñ
jo ik daraḳht pe rahte haiñ beliyoñ kī tarah

ab maiñ ik jalva-e-be-rañg kā shaidā.ī huuñ
har charāġh-e-haram-o-dair bujhā rakkhā hai

dhabba lage na rañg-e-safed-o-siyāh meñ
hai go tamām din ke muqābil tamām raat

ye kis jazīra-e-be-rañg-o-bū meñ baste haiñ
na tā.irān-e-ajam haiñ na āhūvān-e-tatār

bas ek hijr ke mausam kā rañg gahrā thā
har ek rut ko chakhā thā barat ke dekhā thā

vo aaj mujh se milā hai to kitnā banjar hai
jo apnī aañkh meñ sāvan ke rañg rakhtā thā

gulshan meñ aa.ī pairahan-e-rañg ban ga.ī
vo mauj-e-ḳhūñ ki chehra-kushā thī hinā ke saath

dil-e-sozān-e-āshiq maḳhzan-e-rañg-e-vafā hogā
vo hissa qadr ke qābil hai jitnā jal gayā hogā

rivāyatī paikar-e-ġhazal meñ bharā hai rañg-e-jadīd maiñ ne
'ziyā' mire sher meñ muhayyā koī na.ī baat hī milegī

na koī lagan na dil meñ chubhan na rashk-e-suḳhan na rañg-e-chaman
nahīñ thā jinheñ shu.ūr-e-vafā vo aalī maqām ho na sake

hamārā ahd hai be-barg-o-bār shāḳhoñ se
agarche qāfila-e-rañg-o-bū pukārtā hai

ye rañg us kā pasandīda rañg thā maahī
maiñ aaj rone lagā ek shaal bunte hue

havā meñ nashsha hī nashsha fazā meñ rañg hī rañg
ye kis ne pairahan apnā uchhāl rakkhā hai

vo shān-e-ḳhāmushī ki bahāreñ haiñ muntazir
vo rañg-e-guftugū ki gulistāñ banā diyā

paan us ke laboñ pe is qadar hai zebā
ho rañg pe jis ke surḳhī-e-la.al fidā

havā ke rañg meñ duniyā pe āshkār huā
maiñ qaid-e-jism se niklā to be-kanār huā

mirī ārzūoñ ke ḳhvāb the ki fazā-e-husn-o-shabāb the
kahīñ nik.hatoñ meñ bikhar ga.e kahīñ rañg-o-nūr meñ Dhal ga.e

ye kaisī shāḳh ke paivand haiñ daraḳhtoñ par
ye kaise phal haiñ ye rañg-e-bahār kaisā hai

hazār fitna-e-bedār ḳhvāb-e-rañgīñ meñ
chaman meñ ġhuncha-e-gul-rañg laa.e haiñ kyā kyā