Tags-Rang

mere hote zindagī be-rañg ho saktī nahīñ
nabz-e-ālam meñ lahū ban kar ravāñ ho jā.ūñgā

raushnī se tīrgī ta.abīr kar dī jā.egī
rañg se mahrūm har tasvīr kar dī jā.egī

tevrī ke Dhab haiñ aur nigah ke hazār Dol
chitvan ke laakh rañg ġharaz vaah vaah hai

vo rañg kā hujūm sā vo ḳhushbuoñ kī bhiiḌ sī
vo lafz lafz se javāñ vo harf harf se hasīñ

saaf dil hai to aa kudūrat chhoḌ
mil har ik rañg biich aab kī tarah

maiñ huuñ vo tasvīr jis meñ hādse bharte haiñ rañg
ḳhāl-o-ḳhat khulte haiñ mere ḳhanjaroñ ke darmiyāñ

sub.h tak zulf-e-siyah-rañg kā jaadū thā ajab
raat botal meñ thī jitnī bhī bachī ḳharch huī

az kabīr-o-rañg-e-kesar aur gulāl
abr chhāyā hai safed-o-zard-o-lāl

sāġhar-e-chashm meñ mai-kash use bharte hoñge
rañg jab aap ke chehre se chhalaktā hogā

raushnī ko rañg kar ke le ga.e jis raat log
koī saaya mere kamre meñ chhupā rotā rahā

chaman ke rañg-o-bū ne is qadar dhokā diyā mujh ko
ki maiñ ne shauq-e-gul-bosī meñ kāñToñ par zabāñ rakh dī

chāñd meñ kaise nazar aa.e tirī sūrat mujhe
āñdhiyoñ se āsmāñ kā rañg mailā ho gayā

ḳhushbū kī tarah lafz the ma.anī ba-qaid-e-rañg
ye marhale bhī aa.e haiñ arz-e-hunar ke biich

aah kyā dil meñ ab lahū bhī nahīñ
aaj ashkoñ kā rañg phīkā hai

us sabza-rañg kī hai garmī-e-husn goyā
chamke hai mahr dekho zer-e-sahāb kyūñkar

maut aur ziist ke sañgam pe pareshāñ kyuuñ ho
us kā baḳhshā huā sah-rañg-e-alam le ke chalo

aaj dhanak meñ rañg na hoñge vaise jī bahlāne ko
shaam hue par niile piile kuchh ballōn uḌā denā

kuchh terī zulf khulī to merī sāñsoñ pe khulī
tujh pe āvāra-e-ham-rañg-e-sabā maiñ hī huā

gurezāñ rañg-o-bū se dil nahīñ hai
abhī shāyad junūñ kāmil nahīñ hai

jise dekhā vo dīvāna thā naqsh-e-dilnashīñ ke husn-e-ādil kā
jise sochā fanā ke rañg kī tafsīr thā kal shab jahāñ maiñ thā