Tags-Rang

chamak damak meñ Duub ga.e haiñ pyaar vafā ke aslī rañg
'dev' jahāñ vāloñ meñ ab vo pahle se jazbāt kahāñ

ḳhvāboñ kī tasvīroñ meñ ab aao bhar leñ rañg nayā
chāñd samundar kashtī ham tum ye jalve ik saath kahāñ

log bhī saare patthar ke the
rañg bhī un kā patthar sā thā

ik rañg-e-istiġhrāq hai ik nik.hat-e-āvārgī
Thahrā huā gāgar meñ hai bahtā huā sāgar mirā

kuchh to hai rañg sā ehsās ke parde meñ nihāñ
jis ko manzar kī tarah vaqf-e-nazar karnā hai

rañg merā kān-e-zar hai ai sanam
mujh siiñ aa mil gir talā darkār hai

zaḳhm bhī itne hare pahle na the
ye chaman gul-rañg bhī aisā na thā

bahut shagufta-o-rañgīn guftugū hai 'sirāj'
chaman meñ baat tirī rañg-o-bū se khelegī

agar ye jānte chun chun ke ham ko toḌeñge
to gul kabhī na tamannā-e-rañg-o-bū karte

aalam ke sūfiyoñ ke koī kyā samajh se
har rañg se judā haiñ ye be-rañg log haiñ

shahr meñ huuñ aur tanhā huuñ
rañg mirā qasbātī hai

usī ke ġham meñ dhuāñ dhuāñ chashm-e-rañg-o-naġhma
so aks-zār-e-ḳhayāl bhī mojaza usī kā

uḌā sā rañg hai kyuuñ vaqt ke mashīhāo
abhī to manzil-e-dār-o-rasan nahīñ aa.ī

shaidā-e-bostāñ ko sarv-o-saman mubārak
rañgīñ tabī.atoñ ko rañg-e-suḳhan mubārak

kashmīr se ayaañ hai jannat kā rañg ab tak
shaukat se bah rahā hai dariyā-e-gañg ab tak

jab phāgun rañg jhamakte hoñ tab dekh bahāreñ holī kī
aur daf ke shor khaḌakte hoñ tab dekh bahāreñ holī kī

us rañg-rañgīlī majlis meñ vo ranDī nāchne vaalī ho
muñh jis kā chāñd kā TukḌā ho aur aañkh bhī mai ke pyālī ho

sīnoñ se rañg Dhalakte hoñ tab dekh bahāreñ holī kī

gulzār khile hoñ pariyoñ ke aur majlis kī tayyārī ho
kapḌoñ par rañg ke chhīñToñ se ḳhush-rañg ajab gul-kārī ho

kapḌoñ par rañg chhiḌakte hoñ tab dekh bahāreñ holī kī