Tags-Raqeeb

na itne qisse na jañg hotī piyāre tere milāp uupar
raqīb aapī se zahr khāne jo vasl kā tū payām kartā

tirī taraf hai ba-hasrat nazāra-e-nargis
ba-korī-e-dil-o-chashm-e-raqīb sāġhar khīñch

jaanā paḌā raqīb ke dar par hazār baar
ai kaash jāntā na tire rah-guzar ko maiñ

haañ haañ tirā raqīb se be-shak hai rabt-zabt
rutba yaqīn kā hai ziyāda gumān se

dam bhar bhī umr khoī jo zikr-e-raqīb meñ
kaifiyat-e-visāl na paa.ī tamām shab

us naqsh-e-pā ke sajde ne kyā kyā kiyā zalīl
maiñ kūcha-e-raqīb meñ bhī sar ke bal gayā

na bazla-sanj na shā.er na shoḳh-tab.a raqīb
diyā hai aap ne ḳhalvat meñ apnī baar kise

hotā kabhī habīb jo bantā raqīb hai
qismat ke rañg dekhte rah jā.iye zarā

hudūd-e-zāt se bāhar nikal ke dekh zarā
na koī ġhair na koī raqīb lagtā hai

ḳhair ho yā-rab kahīñ vo ḳhud na ban jaa.eñ raqīb
ā.īne par aaj paḌtī haiñ nigāheñ pyaar kī

raqīb barsar-e-parḳhāsh ham se hotā hai
baḌhegī muft meñ takrār dekhte jaao

tumhāre ḳhat meñ nayā ik salām kis kā thā
na thā raqīb to āḳhir vo naam kis kā thā

na maiñ 'muztar' un kā habīb huuñ na maiñ 'muztar' un kā raqīb huuñ
jo bigaḌ gayā vo nasīb huuñ jo ujaḌ gayā vo dayār huuñ

jalā ke ghar se raqīb sham.eñ havā meñ ham tum nikal paḌe haiñ
yahī hai donoñ ko intizār ab ki pahle kis kā diyā bujhegā

bijliyoñ ke raqīb hote haiñ
chaar tinke ajiib hote haiñ

itne bhī na ham ḳharāb hote rahte
kaahe ko ġham-o-alam se rote rahte

gar nahīñ masḳhara raqīb us kuuñ
log kaveñ rīsh-e-ḳhand karte haiñ

dekh apnā hāl-e-zār munajjim huā raqīb
thā sāzgār tāla-e-nā-sāz dekhnā

donoñ se imtihān-e-vafā par ye kah diyā
manvā.iye raqīb ko yā maan jā.iye

us ne kahā hai sabr paḌegā raqīb kā
le aur be-qarār huā be-qarār dil