Tags-Raushni

raushnī se kis tarah pardā kareñge
āḳhir-e-shab sochte haiñ kyā kareñge

mire liye tirī nazroñ kī raushnī hai bahut
ki dekh luuñ tujhe pal bhar mujhe yahī hai bahut

log tārīkiyoñ meñ bhaTakte rahe
dil jalā kar hameñ raushnī mil ga.ī

ġharīb maaoñ sharīf bahnoñ ko aman-o-izzat kī zindagī de
jinheñ atā kī hai tū ne tāqat unheñ hidāyat kī raushnī de

vahīñ kal bhī phir mileñge jahāñ aaj mil rahe haiñ
terī raushnī ke pīchhe mirī tīrgī se aage

āstīnoñ se nikāleñge jiyāle āftāb
bol-bālā raushnī ke shahr kā ho jā.egā

raat aa.ī hai guzar jā.egī
raushnī ban ke bikhar jā.egī

din ko usī se raushnī shab ko usī se chāñdnī
sach to ye hai ki rū-e-yār shams bhī hai qamar bhī hai

yahī 'na.īm' bahut hai jo kaaT lo ye raat
ye kuchh zarūr nahīñ hai ki raushnī hī karo

nahīñ ab rok pā.egī fasīl-e-shahr paanī ko
bahā.e jā rahī hai raushnī kī lahr paanī ko

maiñ añdheroñ meñ kho jā.ūñ mumkin nahīñ
ek parvāne kī raushnī maut hai

terī āñkhoñ se dostī huī hai
tab kahīñ jā ke raushnī huī hai

jahl ko āgahī banāte hue
mil gayā raushnī banāte hue

dil-o-nigāh ke rastoñ meñ kaun haa.il hai
ki ham pe band hue raushnī bhī paanī bhī

uryāñ huā hai maah shab-e-abr-o-bād meñ
jaise safed raushnī ġhāroñ ke saath saath

rok do ye raushnī kī tez dhaar
merī miTTī meñ guñdhī hai raat bhī

chāñd kī bebasī ko samjhūñgī
raushnī kī kamī ko samjhūñgī

nikālo koī to sūrat ki tīrgī kam ho
hamārā ghar hī jalā do jo raushnī kam ho

roz-o-shab aḳhbār kī ḳhabroñ se bahlātā huuñ jī
ye samajhtā huuñ ki ab to raushnī ghar ghar huī

raushnī ke liye darvāza khulā rakhnā hai
shab se ab koī ijāzat nahīñ lī jā saktī