Tags-Raushni

raushnī le kar chalūñgā to mujhe
tum se bhī pahle aur koī DhūñDh legā

apne ghar ko phūñk deñ aur raushnī paidā kareñ
ab hamāre sāmne bas ek rasta rah gayā

raushnī ke zāviyoñ par munhasir hai zindagī
aap ke bas meñ nahīñ hai aap kā saaya yahāñ

zehn-o-dil kī raushnī ko tez-tar kartī huī
guftugū sīdhe tirī dil par asar kartī huī

dil-o-dimāġh ko kyā degā raushnī vo 'hazīñ'
na.ī hayāt kā jo lafz goshvāra nahīñ

'faiz' saudā nahīñ kiyā ham ne
in añdheroñ se raushnī kar ke

husn utar ke aatā hai yuuñ 'umañg' āñkhoñ meñ
jhiil jis tarah gahrī raushnī haḌaptī hai

raushnī ke jalve haiñ phalte phūlte jañgal
jin kī chhattr-chhāyā meñ tīrgī panaptī hai

haar jā.egī yaqīnan tīrgī
gar musalsal raushnī zinda rahī

ye andhī pyaas kā mausam hai 'ahmad'
samundar raushnī kā be-asar hai

ye vaqt raushnī kā muḳhtasar hai
abhī sūraj tulū-e-muntazar hai

sab raushnī ke phuul to khilte hī bujh ga.e
kaḌvā dhuāñ ab āñkhoñ se ro ro nikāliye

auroñ kī raushnī pe na rakh tū burī nazar
apnī hī chhat ke nīche koī āftāb DhūñD

raushnī meñ lafz ke tahlīl ho jaane se qabl
ik ḳhalā paḌtā hai jis meñ ghūmtā rahtā huuñ maiñ

ab jis ke jī meñ aa.e vahī paa.e raushnī
ham ne to dil jalā ke sar-e-ām rakh diyā

hamāre jism agar raushnī meñ Dhal jaa.eñ
tasavvurāt-e-zamān-o-makāñ badal jaa.eñ

jo patiñgā lau pe fidā huā to taḌap ke sham.a ne ye kahā
ise mere dard se kyā ġharaz ye to raushnī kā ġhulām hai

ye jo mere ghar ke jalne se huī hai chār-sū
log kahte haiñ kaheñ maiñ raushnī kaise kahūñ

band haiñ dil ke darīche raushnī mādūm hai
ab jo apnā hashr honā hai hameñ ma.alūm hai

jo āñkheñ señk rahe haiñ unheñ ḳhabar hī nahīñ
yahāñ pe ḳhvāb jale haiñ to raushnī huī hai