Tags-Raushni

ḳhudī kī raushnī meñ maiñ ne dekhā hai aqīdat ko
ḳhudā.ī varna aazar kī mirī Thokar pe rakkhī thī

vo merī chāhat kī raushnī se nikal ke zulmat meñ jī rahā thā
yaqīn mujh ko nahīñ thā lekin vo mujh se kuchh bad-gumāñ thā pahle

jal rahī hai dil meñ sham-e-ārzū
ġham-kade meñ raushnī hai āj-kal

raushnī hī raushnī hotī jahāñ meñ har taraf
gar charāġhoñ kī kiyā kartī nigahbānī havā

ek surūd-e-raushanī nīma-e-shab kā ḳhvāb thā
ek ḳhamosh tīrgī sāneha-āshnā bhī thī

maiñ tīrgī ko amānat tirī samajhtā huuñ
tū raushnī hai to koī kiran utaar mujhe

maar koī shikār par niklā
dasht meñ raushnī huī dekho

ghuT gayā añdhere kā aaj dam akele meñ
har nazar Tahaltī hai raushnī ke mele meñ

chhā rahā hai saarī bastī meñ añdherā
raushnī ko, ghar jalānā chāhtā huuñ

sirf maiñ hī nahīñ sab Darte haiñ tanhā.ī se
tīrgī raushnī vīrāna sadā chāhtā hai

raushnī thī savāl kī had tak
har nazar kho ga.ī javāboñ meñ

āsmāñ se raushnī utrī bhī dhuñdlā bhī chukī
naam raushan hai to bas zulmat kī tābānī kā hai

vo raushnī kī talab meñ gum hai maiñ ḳhushbuoñ kī talāsh meñ huuñ
maiñ dā.eroñ se nikal rahā huuñ vo dā.eroñ meñ samā rahā hai

ye tez raushnī rātoñ kā husn khā ga.ī hai
tumhāre shahr meñ ham apnī chāñdnī se ga.e

havā se raushnī se rābta nahīñ rahā
jidhar thiiñ khiḌkiyāñ udhar makān ban gayā

us ke milne se na hotī raushnī
ghaT to jaatī ġham kī zulmat kam se kam

is jahāñ meñ to apnā saaya bhī
raushnī ho to saath chaltā hai

kaash koī ġham-gusār aa.e madārāteñ kare
mom-battī kī pighaltī raushnī ke karb meñ

koī masīhā shāyad us ko chhū guzrā
dil ke andar itnī raushnī kab hotī hai

raushnī kī bhiik māñgūñ ġhair se
itnā bhī tārīk merā ghar nahīñ