Tags-Raushni

akele rahte to shāyad na dekhtā koī
sitāra ho ga.e ik raushnī ke mel se ham

mah o anjum ko zau baḳhshī hai 'mumtāz'
hamāre āñsuoñ kī raushnī ne

vo bhī ro ro ke bujhā Daalā hai ab āñkhoñ ne
raushnī detā thā jo ek diyā andar se

tum ko sochā tīrgī meñ der tak
maiñ nahāyā raushnī meñ der tak

rāste dhuñdlā ga.e haiñ raushnī vaalo suno
va.ada jalne kā kiyā thā TimTimāne kā nahīñ

kamre meñ maze kī raushnī ho
achchhī sī koī kitāb dekhūñ

diye jalā.e ummīdoñ ne dil ke gird bahut
kisī taraf se na is ghar meñ raushnī aa.ī

charāġh jab bhī jalāyā koī to gul na kiyā
ye raushnī kī rivāyāt ke munāfī thā

chhan chhan ke aa rahī ho guphāoñ meñ raushnī
tan par vahī libās hoñ peḌoñ kī chhāl ke

ek rū-e-hasīñ nazar aayā
ab charāġhoñ meñ raushnī aa.ī

aao to mere sahn meñ ho jaa.e raushnī
muddat guzar ga.ī hai charāġhāñ kiye hue

jañgal kī dhuup chhāñv hī jañgal kā husn hai
sāyoñ ko bhī qubūl karo raushnī ke saath

abhī is raushnī kī asliyat kā raaz mat kholo
abhī maiñ chāñdnī ke pur-fusūñ hairat-kade meñ huuñ

vo raushnī hai ki āñkhoñ ko kuchh sujhā.ī na de
sukūt vo ki dhamāka bhī ab sunā.ī na de

añdhere meñ gayā vo raushnī meñ lauT aa.egā
diyā jo dil meñ jaltā hai usī ko baam par le jā

jāgte logoñ ne shab-māroñ kī jab chalne na dī
din chaḌhe vo raushnī ko bad-duā.eñ de ga.e

chamaktī bijliyāñ hī bijliyāñ haiñ
chaman meñ raushnī hī raushnī hai

ye 'nasīr' shām-e-supurdagī kī udaas udaas sī raushnī
ba-kanār-e-gul zarā dekhnā ye tumhī ho yā koī aur hai

ye jo raushnī hai kalām meñ ki baras rahī hai tamām meñ
mujhe sabr ne ye samar diyā mujhe zabt ne ye hunar diyā