Tags-Raushni

āñkhoñ meñ raushnī kī jagah thā ḳhudā kā naam
paañv tuḌā ke mar rahe jaate kahāñ janāb

kaalī zamīñ pe chhantī darīchoñ se raushnī
bāhar to jhāñkiye hai anokhā samāñ janāb

lahū kī buuñd girī raushnī kā phuul khilā
phir us ke ba.ad koī aur thī tarañg mirī

ik lau hue ḳhayāl to kuchh raushnī huī
jab tak sharar the chāra-e-zulmat na kar sake

charāġh-e-zindagī hai yā bisāt-e-ātish-e-rafta
jalā kar raushnī dahlīz-e-jāñ par sochte rahnā

huī jo jashn-e-bahārāñ ke naam se mansūb
ye āshiyānoñ ke jalne kī raushnī to nahīñ

numūd-e-sub.h kī zartār raushnī ke saath
mahakte phuul darīche se jhāñk kar dekheñ

nazar bachā ke jise dekhte the mere harīf
samā gayā mirī āñkhoñ meñ raushnī kī tarah

tahzīb-e-nau kī raushnī meñ jal-bujhe tamām
maazī kī yādgār mire ilm aur funūn

tirī nazar se diloñ ke charāġh jal uTThe
inhīñ charāġhoñ se duniyā ne raushnī paa.ī

raushnī parda-e-mizgāñ se chhinī jaatī hai
kis ne ye ḳhvāb-gah-e-dil meñ ziyā-bārī kī

raushnī kā parda hai darmiyāñ tire mere aur pyaar jaarī hai
pyaar meñ mohabbat meñ ham na ḳhud ko badleñge aisī apnī yaarī hai

ajiib shaḳhs thā kuchh der guftugū jo huī
dil o dimāġh meñ ik raushnī utar aa.ī

bahut sī umr miTā kar jise banāyā thā
makāñ vo jal gayā thoḌī sī raushnī ke liye

usī se tīra-shabī meñ hai manzaroñ kā vajūd
vo raushnī jo mashiyyat ke baab se huī thī

raushnī ko guñg hote jis ne dekhā ho kabhī
kis havāle se use tīra-shabī taḌpā.egī

añdherā laakh ho mujh ko sahar kī aas rahtī hai
yahī vo raushnī hai jo mujhe Darne nahīñ detī

raushnī lene chale the aur andhere chhā ga.e
muskurāne bhī na paa.e the ki aañsū aa ga.e

is jahāñ meñ pyaar mahke zindagī baaqī rahe
ye duā māñgo diloñ meñ raushnī baaqī rahe

tum ne ḳhushbū se kabhī ahd-e-vafā bāñdhā hai
raushnī ko kabhī bistar meñ liTā kar dekho