Tags-Raushni

raushnī mere charāġhoñ kī dharī rahnā thī
phir bhī sūraj se mirī ham-safrī rahnā thī

usī ne har shab kī sub.h kī hai har ik diye kī vo raushnī hai
kabhī mujassam bhī ho ke kah de ki dekh terā hī ḳhvāb maiñ huuñ

dhuñdle dhuñdle naqsh lā-hāsil tamannāoñ kī raakh
raushnī ke dā.ere se duur yādoñ kā ḳhumār

apne atrāf añdheroñ ko basā.e rakhiye
raushnī in se zarā aur nikhar jaatī hai

dil kī ek ik kanī bichhātī huuñ
rāt-bhar raushnī bichhātī huuñ

lau diye kī siskiyāñ letī huī
TimTimātī raushnī hai aur maiñ

kabhī kabhī to añdherā bhī ḳhūb-sūrat hai
tirā ḳhayāl kahīñ raushnī na ban jaa.e

sameT kar tire jalvoñ kī raushnī maiñ ne
dil-o-nigāh kī duniyā sañvār lī maiñ ne

mirī tamannā hai ab ke tum phir milo to jī bhar ke muskurā.eñ
ki dekhnā hai ye raushnī kā safar bahut der ba.ad jā kar

uThe jidhar bhī nazar raushnī udhar jaa.e
karishme kaise haiñ us kī nazar ke dekh zarā

khil ke raheñge dekhnā chaar sū raushnī ke phuul
raat ke dasht kī taraf naqsh-gar-e-sahar ga.e

kyā zarūrī hai shā.erī kī jaa.e
dil jalā kar hī raushnī kī jaa.e

samā.atoñ meñ hone lagtī hai ajiib raushnī
tirī sadā-e-nūr kī lapak jhapak bhī ḳhuub hai

rañg ke jaal hī milte haiñ jidhar jaatā huuñ
raushnī yuuñ na mujhe tañg kiyā kartī thī

tumhāre ba.ad ujāle se ho ga.ī thī chiḌh
hamārī aañkh ko rotī hai raushnī ab tak

charāġhoñ ko bujhāte phir rahe ho
tumhārā mas.ala hai raushnī kyā

tīrgī ne masḳh kar diiñ sūrateñ
aane vaalī raushnī dekhegī kyā

farz ham par hai raushnī kā safar
nuur kī chhūT ke haiñ jaa.e ham

vo raushnī kā ḳhvāb thā magar vahī sarāb thā
uruuj meñ chhupī huī thī ibtidā zavāl kī

ai sarāpā-sham.a bazm-e-māh-o-anjum se nikal
kin añdheroñ ko hai terī raushnī darkār dekh