Tags-Raushni

tum ne lams-e-mo'tabar se baḳhsh dī vo raushnī
mujh ko merī ārzūoñ kī sahar lagte ho tum

ḳhabar kī raushnī ab raushnī nahīñ kartī
so ho na ho ye ḳhabar bhī ḳhabar kā dhokā hai

bujhīñ sham.eñ to dil jalā.e haiñ
yuuñ añdheroñ meñ raushnī kī hai

raushnī bhī nahīñ havā bhī nahīñ
maañ kā nemul-badal ḳhudā bhī nahīñ

duniyā meñ har qadam pe hameñ tīrgī milī
dekhā jo apne dil kī taraf raushnī milī

aql se kasb-eأraushnī kar ke
mulk-e-dil ho gayā hai rū-ba-zavāl

vo mirī sub.hoñ kā taarā vo mirī rātoñ kā chāñd
mere dil kī raushnī to thā magar merā na thā

kab tak rahegā raushnī ke intizār meñ
jaltā nahīñ hai ḳhud se diyā ehtisāb kar

sulagtī rahī raat bhar chāñdnī
shab-e-hijr thī raushnī kam bahut

jo bharī mahfil ke dil meñ raushnī phailā ga.ī
vo ḳhafā hai aaj tak merī isī taqrīr par

aadmī raushnī nahīñ paa.e
jab talak bandagī nahīñ paa.e

satr-dar-satr ḳhuuñ jalāyā hai
lafz meñ raushnī bharī rahegī

donoñ sarmast haiñ ehsās-e-suḳhan-sāzī meñ
raushnī aañkh ko aur dil ko hazīñ likkhā gayā

darīche band hoñ achchhā hai lekin
zarūrī hai havā bhī raushnī bhī

pahuñch ke dekhā to māñge kī raushnī ke sivā
falak ke tāroñ meñ kuchh hai na māhtāb meñ kuchh

zamīñ par raushnī aatī rahī jaatī rahī lekin
hamārī ḳhāna-vīrānī bas ik mehvar pe rakkhī thī

Dar nahīñ paas aa mire pyāre
nuur huuñ raushnī nahīñ huuñ maiñ

ye tīrgī bhī kisī raushnī se niklī hai
ye raushnī bhī kisī tīrgī kā hāsil hai

charāġh bujh bhī chukā raushnī nahīñ jaatī
vo saath saath hai aur bekalī nahīñ jaatī

maiñ terī bastī se bhaag kar duur ik ḳharābe meñ aa gayā huuñ
ye vo ḳharāba hai jis meñ hastī kī raushnī kā guzar nahīñ hai