Tags-Raushni

vo chāñd-rāt terā bichhaḌnā nazar meñ hai
is ghar meñ tere ba.ad kahāñ raushnī huī

dil hī to ek dair-o-haram kā charāġh thā
dil bujh gayā to phir na kahīñ raushnī huī

nazreñ milīñ charāġh jale raushnī huī
lau de uThī phir apnī tabī.at bujhī huī

ik raushnī kī kiran phuuT kar
sard vīrān kamre ke tārīk dīvār-o-dar se ulajhne lagī

raushnī kaisī agar aalam añdherā ho gayā
dil meñ bas jā.egī āñkhoñ meñ utar jā.egī raat

shab-e-siyāh meñ bhī jo thā raushnī kā safīr
kinār-e-bām se vo jhāñktā qamar na rahā

kuchh aise raushnī dil meñ utartī hai qarīne se
bahut imkāñ tire va.adoñ ke sadqe jaag uThte haiñ

us kī mahfil meñ unhīñ kī raushnī jin ke charāġh
maiñ bhī kuchh hotā to merā bhī diyā hotā nahīñ

tere ḳhvāboñ ke ba.ad āñkhoñ meñ
ho sake raushnī bahāl kahāñ

phir dar-e-dil par huī haiñ raushnī kī dastakeñ
phir sitāra sā koī bālā-e-bām aatā huā

siyāh-rāt pashemāñ hai ham-rakābī se
vo raushnī hai tire ġham kī māhtābī se

nahīñ mohlat ki maiñ ḳhurshīd detā
tirī āñkhoñ kī bujhtī raushnī ko

ujāle bāñTtī phirtī hai duniyā
syāhī se ulajhtī raushnī ko

sochtā huuñ tirī tasvīr dikhā duuñ us ko
raushnī ne kabhī saaya nahīñ dekhā apnā

siyāh dasht meñ imakān-e-raushnī bhī nahīñ
magar ye haath andhere meñ jalnā chāhtā hai

hoshiyār in rahzanoñ se ai urūs-e-bamba.ī
tere ruḳhsāroñ kī kam hone lagī hai raushnī

manzaroñ se bahalnā zarūrī nahīñ ghar se bāhar nikalnā zarūrī nahīñ
dil ko raushan karo raushanī ne kahā raushnī ke liye ek taaza ġhazal

vahī mailī mailī sī chāñdnī vahī dhundlī dhundlī sī raushnī
ye charāġh koī charāġh hai na jalā huā na bujhā huā

raushnī sī kar ga.ī qurbat kisī ke jism kī
ruuh meñ khultā huā mashriq kā darvāza lagā

jaltī-bujhtī sī raushnī ke pare
simTā simTā sā ik makāñ tanhā