Tags-Raushni

hazār sham.a farozāñ ho raushnī ke liye
nazar nahīñ to añdherā hai aadmī ke liye

ubhrā jo chāñd ūñghtī parchhā.iyāñ milīñ
har raushnī kī god meñ tanhā.iyāñ milīñ

chamak uThtā hai ik bhūlā huā chehra achānak
na jaane tīrgī kis raushnī par mushtamil hai

pahle apne saath chalte the sitāre shauq se
ab to apnī raushnī bhī ham-safar hotī nahīñ

tire jalā.e diyoñ meñ bhaḌaktī aag kā pher
zamīñ kī rehl pe rakkhe na raushnī kī kitāb

raushnī kī thī kahāñ fursat jo vo ye sochtī
kaise kaise us kī ḳhātir ham havan hote rahe

ye raushnī kabhī pahle na thī yahāñ 'aḳhtar'
sitāra raat kī palkoñ pe koī chamkā kyā

raushnī ik haqīr taare kī
aa ga.ī ho ke kahkashāñ se ḳharāb

mire andar se yuuñ pheñkī kisī ne raushnī mujh par
ki pal bhar meñ mirī saarī haqīqat khul ga.ī mujh par

shab-e-hijr terā ḳhayāl bhī
baḌī raushnī kā sabab huā

kārvāñ 'ḳhurshīd' jaane kis guphā meñ kho gayā
raushnī kaisī ki sahrā meñ sadā koī nahīñ

mujhe najāt mile tīra-kāriyoñ se kaash
maiñ nuur ugā.ūñ yahāñ raushnī ma.āsh karūñ

bahut kuchh mehnatoñ se ik zarā izzat kamā.ī hai
añdhere jhoñpaḌe meñ raushnī jugnū se aa.ī hai

sifāt meñ zaat hai numāyāñ huī vo bāliġh-nazar hai nisbat
kiyā hai mahv-e-jamāl-e-jānāñ ye sair-qalbī kī raushnī hai

vo aayā turbat pe bevafā gul har ik se afsurda ho ke pūchhā
ye kis kī mash.had pe hai charāġhāñ jo ibrat-añgez raushnī hai

raushnī ke safīne bulāte raheñ
sāhil-e-shab se ho kar guzar jā.ūñgā

ai mire dil kī raushnī to yūñhī jagmagā.e jā
mere jahān-e-shauq par kaif ban ke chhā.e jā

ai merī jaañ mirī āñkhoñ kī raushnī sun to
jo zaḳhm tū ne diye maiñ ne gul banā Daale

ham rāt-bhar jaleñ bhī tumheñ raushnī bhī deñ
ham ko charāġh jaisā muqaddar nahīñ milā

zindagī bhar rahe haiñ añdhere meñ ham
raushnī se pareshān hote hue