Tags-Raushni

pahle to chhīn lī mirī āñkhoñ kī raushnī
phir ā.īne ke sāmne laayā gayā mujhe

sochiye gar use har-nafas maut hai kuchh mudāvā bhī ho be-hisī ke liye
sūrajoñ kī virāsat milī thī hameñ dar-ba-dar ho ga.e raushnī ke liye

shab ke ḳhilāf barsar-e-paikār kab hue
ham log raushnī ke talabgār kab hue

zulmat kī kashtiyoñ ko bhañvar hai ye raushnī
dar khul rahe haiñ dānish-o-ilm-o-ḳhabar ke dekh

kuchh sitāre haiñ aur ham haiñ 'jamīl'
raushnī jin se rahguzār meñ hai

raushnī kuchh charāġh kī laao
jis jagah dafn huuñ nihāñ huuñ maiñ

maiñ ne chup ke añdhere meñ ḳhud ko rakhā ik fazā ke liye
hujra-e-zāt meñ raushnī laane vaalī duā ke liye

maiñ raushnī se milā thā bas itnā yaad rahā
phir us ke baad se chāroñ taraf añdherā thā

kho diyā raushnī meñ apnā vajūd
ab añdheroñ meñ DhūñDhtā huuñ maiñ

mirī tabāhī-e-dil par to rahm khā na sake
jo raushnī meñ rahe raushnī ko pā na sake

shab-e-dair-o-haram se mai-kade tak
mire hī āñsuoñ kī raushnī hai

koī mujh meñ hai maiñ kisī meñ huuñ
maiñ añdherā huuñ raushnī meñ huuñ

shab-e-visāl kī yārab na raushnī kam ho
vo nūr-e-āriz-e-rashk-e-qamar qamar meñ rahe

raushnī DhūñD ke laanā koī mushkil to na thā
lekin is dauḌ meñ har shaḳhs ko jalte dekhā

raushnī meñ tirī raftār se kartā huuñ safar
zindagī mujh se kahīñ tez na chalne lag jaa.e

āsmāñ par aañkh sūraj kī na bujh jaa.e kahīñ
hai zamīñ par raushnī kā is qadar sailāb sā

vo ek sach mirī āñkhoñ meñ hai 'kiran' ab bhī
jo ḳhvāb ban ke rahā dil meñ raushnī kī tarah

sameT rakkhā thā jis kahkashāñ ko dāman meñ
vo ghar meñ utrī hai ik taaza raushnī kī tarah

vo ek shaḳhs añdheroñ meñ jis ne chhoḌ diyā
vo ab bhī rahtā hai āñkhoñ meñ raushnī kī tarah

har ek mausam meñ raushnī sī bikherte haiñ
tumhāre ġham ke charāġh merī udāsiyoñ meñ