Tags-Raushni

maiñ hisār-e-zulmat-e-shab meñ huuñ jo bhaTak rahā huuñ galī galī
mujhe tīrgī se gilā nahīñ mujhe raushnī kī talāsh hai

ek aḳhbār bhī aaj aisā nahīñ
de ḳhabar sub.h kī raushnī ghol kar

hue raushan na phir bhī bām-o-dar fikr-o-tasavvur ke
hazāroñ baar kī bazm-e-jahāñ meñ raushnī maiñ ne

ajiib tarah se raushan huī hai ḳhalvat-e-ġham
ki raushnī hai bahut aur diyā jalā bhī nahīñ

zarā sī raushnī phūTī to sub.h-dam sūraj
fazā meñ Duub gayā āstīñ chaḌhāte hue

ahd-e-kam-fahm kī ujlat hai ishāra 'rāhib'
raushnī chaak pe zulmat ko bhī dhar saktī hai

bastiyāñ hoñ kaisī bhī pastiyāñ hoñ jaisī bhī
har tarah kī zulmat ko raushnī kahā jaa.e

tārīk zindagī ko banāne lagā hai vo
sūraj se raushnī ko churāne lagā hai vo

mujh se hī le ke mere salīqe kī raushnī
tahzīb kī zabān sikhāne lagā hai vo

charāġh-e-yād kī lau ham-safar kahāñ tak hai
ye raushnī mirī dahlīz par kahāñ tak hai

shukriya ai jalāne vaale terā
duur tak ab hai raushnī mujh meñ

din ujālā gañvā ke baiTh gayā
raat ne raushnī churā lī hai

bazm-e-tasavvurāt meñ yādoñ kī raushnī
aalam ajiib raat kī tanhā.iyoñ meñ thā

pahle to raushnī huī ījād
ba.ad meñ tīrgī huī ījād

lahū meñ kyā batā.eñ raushnī kaisī milī thī
milī thī bas mohabbat jis tarah kī bhī milī thī

chhīn lo ehsās mujh se chhīn lo merā shu.ūr
is ghaTā meñ tan phuñkā is raushnī se man jalā

kyuuñ raushnī-o-rañg se ma.amūr na ho dil
sunsān sahī ā.ina-ḳhāna hai tumhārā

jhulas ga.e nigāh ke tamām ḳhvāb aañch se
ye dāstān hai nazar pe raushnī ke vaar kī

ek saaya sā phaḌphaḌātā hai
koī shai raushnī se guzrī hai

vasf sūraj hai raushnī kyā hai
tū agar hai to zindagī kyā hai