Tags-Raushni

na ḳhizāñ meñ hai koī tīrgī na bahār meñ koī raushnī
ye nazar nazar ke charāġh haiñ kahīñ bujh ga.e kahīñ jal ga.e

maiñ tīrgī ko amānat tirī samajhtā huuñ
tū raushnī hai to koī kiran utaar mujhe

vo milā mujh ko na jaane ḳhol kaisā oḌh kar
raushnī gum ho ga.ī apnā hī saayā oḌh kar

mire ḳhāliq-e-gulistāñ ye samāñ na phir dikhānā
ki ḳhud apnī raushnī meñ nazar aa.e āshiyānā

in ābloñ kī raushnī bhaTkegī shahr meñ
ai kūcha-gard gardish-e-pā ko sameT le

bām-o-dar kī raushnī phir kyuuñ bulātī hai mujhe
maiñ nikal aayā thā ghar se ik shab-e-tārīk meñ

saare jahāñ kī raushnī kab māñgtī huuñ maiñ
bas merī zindagī kā sitārā mile mujhe

vo dil meñ utreñ to ek ho jaa.eñ raushnī deñ
dhanak ke rañgoñ ko apnī āñkhoñ meñ Dāltā huuñ

ik raushnī thī dil meñ bahut pāk-o-sāf the
aisā na thā inaad abhī kal kī baat hai

qismat meñ apnī sub.h kī ab raushnī kahāñ
ashkoñ ke bhī diye na jalā.eñ to kyā kareñ

har raushnī 'sirāj' charāġh-e-haram nahīñ
is sat.h par nigāh ko laa.eñ to kyā kareñ

ḳhayāl-e-marg baḌī shai hai zindagī ke liye
añdherā jaise zarūrī hai raushnī ke liye

taqsīm karne niklā thā vo raushnī magar
jalte hue diye ko havā kā savāl thā

jalāl-e-husn dikhā mere māhtāb-e-jamāl
tū raushnī hai shaboñ ke asar se niklegā

yuuñ to jugnū bhī haiñ hasīñ lekin
in se to raushnī nahīñ hogī

raushnī ho na sakī shaam ke hañgām ke saath
aur ham diip jalāte rahe har shaam ke saath

log māñge ke ujāle se haiñ aise mar.ūb
raushnī apne charāġhoñ kī burī lagtī hai

dhuāñ chhaTā sho.ale raqs meñ haiñ nazar uThā dekh raushnī meñ
ye tujh ko kyā ho gayā hai hamdam tirā nahīñ merā āshiyāñ hai

raushnī ham pe ināyat nahīñ karne vaalī
ham charāġhoñ se shikāyat nahīñ karne vaale

use musavvir ne raushnī se badan kiyā hai
añdherī ḳhushbū jo dīda-e-ḳhvāb-kār meñ thī