Tags-Raushni

maiñ din ko shab se bhalā kyuuñ alag karūñ saanī
ye tīrgī bhī to ik raushnī kā hissa hai

raushnī dekh ke chuñdhiyā jaa.eñ
jo añdheroñ meñ baḌhe aur pale

raushnī meñ tirī raftār se kartā huuñ safar
zindagī mujh se kahīñ tez na chalne lag jaa.e

ġharīb maaoñ sharīf bahnoñ ko aman-o-izzat kī zindagī de
jinheñ atā kī hai tū ne tāqat unheñ hidāyat kī raushnī de

sab añdheroñ se judā dil kā añdherā jis tarah
har ujāle se hai ghar kī raushnī bilkul alag

shiddat-e-ġham hī ilāj-e-ġham bhī hotā hai 'kamāl'
baḌhtī haiñ tārīkiyāñ to raushnī paatā huuñ maiñ

rafta rafta qubūl hoñge use
raushnī ke liye na.e haiñ ham

kūcha-e-yār meñ ho raushnī apne dam kī
ka.aba o dair kareñ gabr o musalmāñ ābād

sub.h ḳhud batā.egī tīrgī kahāñ jaa.e
ye charāġh kī jhūTī raushnī kahāñ jaa.e

roz-o-shab yaañ ek sī hai raushnī
dil ke dāġhoñ kā charāġhāñ aur hai

irfāñ kī raushnī se kudūrat chalī ga.ī
ā.īna ban gayā mire musht-e-ġhubār kā

ek ek nafas meñ raushnī hai
yādoñ ke charāġh jal rahe haiñ

yahī ik mashġhala hai zindagī kā
ta.āqub kar rahā huuñ raushnī kā

'nayyar' ho aaise daur meñ kyā raushnī kī baat
bin tel kā charāġh liye phir rahā huuñ maiñ

ġhurūb-e-mehr pe kis ne lahū chaḌhāyā hai
ye kis ne ḳhuun jalāyā hai raushnī ke liye

na.e charāġh na.ī raushnī atā karte
agar purāne diye un se kuchh vafā karte

turbat pe merī hogī takalluf kī raushnī
kāfūr bahr-e-sham-e-shabistāñ ḳharīdiye

shah-rāh-e-raushnī pe chalā hai jo mere saath
tārīk rāstoñ meñ mirā ham-safar bhī ho

raushnī phailī to sab kā rañg kaalā ho gayā
kuchh diye aise jale har-sū añdherā ho gayā

chāñd ban kar mirī shohrat meñ ujālā kar do
raushnī ban ke bikhar jaao ġhazal hone tak