Tags-Raushni

is se to apne haq meñ añdherā hī ḳhuub thā
be-nūr ho ga.e haiñ na.ī raushnī se ham

zinda rahnā hai to sāñsoñ kā ziyāñ aur sahī
raushnī ke liye thoḌā sā dhuāñ aur sahī

isī charāġh se har samt raushnī hogī
jalā hai dil to diye sab bujhā rahī huuñ maiñ

ye tīrgī to bahar-e-hāl chhaT hī jā.egī
na raas aa.ī hameñ raushnī to kyā hogā

raushnī merī huā chāhtī hai
bas vo darvāza khulā chāhtī hai

thakā huā huuñ kisī saa.e kī talāsh meñ huuñ
bichhaḌ gayā huuñ sitāroñ se raushnī kī tarah

ye añdherā hai aur aise hī nahīñ khultā ye
der tak raushnī kī jaatī hai tab khultā hai

ye nujūm-o-shams-o-qamar sabhī meñ jo raushnī hai mujhī se hai
mirā qarz-dār hai āsmāñ mire zaḳhmoñ hī kī vo taab hai

kyā raushnī-e-husn-e-sabīh anjuman meñ hai
fānūs meñ hai sham.a ki tan pairahan meñ hai

tumhāre husn kī jis dil ko raushnī na mile
ham aise dil ko charāġh-e-mazār kahte haiñ

raushnī mahtāb se baḌh kar
dil meñ shāh-e-arab tumhārī hai

siyāh raat kī har dilkashī ko bhuul ga.e
diye jalā ke hamīñ raushnī ko bhuul ga.e

haqīqatoñ se gurez insāñ kā ek ehsās-e-kamtarī hai
hayāt baḳhshe jo zulmatoñ ko vo raushnī raushnī nahīñ hai

tīra-baḳhtoñ ke mazāroñ par na hogī raushnī
aazmā dekho charāġh-e-dast-e-mūsā bhī sahī

dete nahīñ sujhā.ī jo duniyā ke ḳhatt-o-ḳhāl
aa.e haiñ tīrgī meñ magar raushnī se ham

shukriya bazāriyat kī raushnī kā shukriya
gaañv kī pagDañDiyāñ bāzār kī bāteñ kareñ

raushnī detī vo kaise rah-e-ulfat pe 'ra.īs'
sham-e-ummīd jalā.ī thī magar paanī meñ

yaar kī mahfil sajī mai kī mahak chhāne lagī
zehn-o-dil meñ ye kahāñ se raushnī aane lagī

ek hī sūrat yahāñ chāroñ taraf
raushnī aisī bhī hotī hai bhalā

raushnī ab mere ashkoñ se hai bas
tīrgī aisī bhī hotī hai bhalā