Tags-Raushni

atrāf meñ apne jo phailī raushnī mahsūs kartī huuñ
to lagtā hai

ik tabassum se umr bhar ke liye
raushnī de ga.e ḳhayāloñ ko

raushnī ho nazar-dar-nazar raushnī
ik kamī hai kamī-dar-kamī zaḳhm de

kajlā ga.ī hai raushnī garche charāġh kī
lekin nahīñ huuñ aas se māyūs aaj tak

lafzoñ kī narmiyoñ se khulā chāñd is tarah
kartī huuñ us kī raushnī mahsūs aaj tak

jo mahal ke jhaaḌ utaar lo to mile zamīñ ko bhī raushnī
inhīñ ḳhalvatoñ ne baḌhā.ī haiñ mirī anjuman kī udāsiyāñ

koī raushnī kī ramaq nahīñ na koī dhueñ kā nishān hai
ye diyā bhī 'sumbul' ajiib hai na jalā huā na bujhā huā

kyuuñ jaage hue shahr meñ tanhā hai har ik shaḳhs
ye raushnī kaisī hai ki saaya bhī judā hai

vo raushnī kā havāla vo rañg-o-bū kā safīr
marī jamāl-pasandī kahīñ se laa.e use

nahīñ vo sham-e-mohabbat rahī to phir 'āsim'
ye kis duā se mire ghar meñ raushnī sī hai

balā se ho shaam kī siyāhī kahīñ to manzil mirī milegī
udhar añdhere meñ chal paḌūñgā jidhar mujhe raushnī milegī

use ḳhabar hai kahāñ raushnī kā māḳhaz hai
vo tīrgī meñ diloñ ko jalāne vaalā hai

kar sakā hai gadlā kaun raushnī ke chashme ko
chāñd bujh nahīñ jaatā āñdhiyoñ ke chalne se

kiran aa.ī kahāñ se raushnī kī
añdhere meñ koī jugnū jalā kyā

tilāvatoñ meñ haiñ masrūf tā.irān-e-sahar
ufuq ne kholā hai kirnoñ kī raushnī kā varaq

jo tīrgī meñ bhaTakte haiñ rahnumā haiñ vo
jo raushnī hai use tīrgī samajhte haiñ

añdheroñ meñ panāheñ DhūñDhtā huuñ
diye haiñ zaḳhm itne raushnī ne

diye haiñ rañj saare āgahī ne
añdhere meñ rakhā hai raushnī ne

'māmūn' azal se tā-abad nahīñ hai koī raushnī
ḳhalā meñ duur duur tak bas ik aziim raat hai

maiñ un kī raah dekhtā huuñ raat bhar
vo raushnī dikhāne vaale kyā hue