Tags-Raushni

fareb khaa.e haiñ rañg-o-bū ke sarāb ko pūjtā rahā huuñ
magar natā.ej kī raushnī meñ ḳhud apnī manzil pe aa rahā huuñ

vo shaḳhs jo nazar aatā thā har kisī kī tarah
hisār toḌ ke niklā hai raushnī kī tarah

sadiyāñ guzar rahī haiñ magar raushnī vahī
ye sar hai yā charāġh sar-e-dār dekhnā

ye jo mere man meñ hai raushnī yahī zindagī yahī bandagī
mirī fikr meñ tire zikr meñ jo charāġh haiñ vo jalā piyā

dekh le mujh ko abhī kuchh raushnī baaqī hai mujh meñ
shaam tak ik ret kā tūfān aane kī ḳhabar hai

maiñ raushnī huuñ to merī pahuñch kahāñ tak hai
kabhī charāġh ke nīche bikhar ke dekhūñgī

kaun ḳhvāboñ ke jazīre se chalā aayā 'ḳhayāl'
dil meñ ik raushnī hai sub.h-e-daraḳhshāñ kī tarah

band āñkheñ jab khulīñ to raushnī pahchān lī
be-ḳhabar ham hoñ to hoñ par be-basar itne na the

zindagī ko dekhā hai zindagī se bhāge haiñ
raushnī ke āñchal meñ tīrgī ke dhāge haiñ

pyaar kī raushnī nahīñ miltī
un makānoñ meñ un makīnoñ meñ

kal raat jugnuoñ kī samundar pe bhiiḌ thī
lagtā thā raushnī kā jazīra bikhar gayā

saare aalam meñ koī raushnī sī phūTī hai
saarī duniyā meñ koī nuur ubhartā dekho

siyāhiyoñ kā nagar raushnī se aT jaa.e
bahut tavīl hai yā-rab ye raat kaT jaa.e

meñ bolī tīrgī har-sū ziyāda hai
vo bolā phailne do raushnī merī

raushnī kī jañg meñ tārīkiyāñ paidā huiiñ
chāñd pāgal ho gayā taare bhikārī ho ga.e

terī zulfoñ meñ tīrgī hai bahut
lā mujhe raushnī banāne de

jab se aa.ī hai dīpāvalī
har taraf chhā.ī hai raushnī

nasheman ḳhaak hone se vo sadma dil ko pahuñchā hai
ki ab ham se koī bhī raushnī dekhī nahīñ jaatī

ye merī soch har zarre meñ sūraj kī tamannā.ī
ye dil kī raushnī ko lamhe lamhe meñ samotī hai

jo bujh chukā us ek sitāre kī raushnī
ab bhī savād-e-shahr-e-dil-o-jāñ ke paas hai