Tags-Raushni

sochā hai ye maiñ ne pī ke aksar
nashshe meñ ye raushnī sī kyā hai

raushnī kī ḳhvāhish meñ jal uThe na pairāhan
raushnī meñ sho.ale haiñ raushnī se mat khelo

zindagī kī chāhat meñ zindagī se mat khelo
raushnī ke dīvāno raushnī se mat khelo

khule bāloñ se muñh kī raushnī phūTī nikaltī hai
tumhārā husn to sāhab añdhere kā ujālā hai

jinheñ raushnī kā lihāz thā jinheñ apne ḳhvāb pe naaz thā
maiñ unhī kī saf meñ jalā kiyā maiñ usī qatār meñ bujh gayā

mujhe kyā ḳhabar thī tirī jabīñ kī vo raushnī mire dam se thī
maiñ ajiib sāda-mizāj thā tire e'tibār meñ bujh gayā

mire aa.ine meñ jo tasvīr terī ubhar aa.ī hai
ye jhuTlāne se fā.eda? mujh ko ye raushnī lagtī hai

ye raushnī kī kiran hai ki aag kā sho.ala
har ek ghar mujhe jaltā huā nazar aayā

gahrī tārīkī thī sannāTā thā par ik jugnū
raushnī kā mujhe ehsās dilātā hī rahā

girnī thī ham pe barq-e-tajallī na tuur par
dete haiñ baada zarf-e-qadah-ḳhvār dekh kar

bujh rahe haiñ charāġh-e-dair-o-haram
dil jalāo ki raushnī kam hai

ye mai-ḳhāne meñ kis kā paimāna chhalkā
bahut duur tak raushnī ho rahī hai

halqa kiye baiThe raho ik sham.a ko yaaro
kuchh raushnī baaqī to hai har-chand ki kam hai

mire jalte hue ghar kī nishānī bas yahī hogī
jahāñ is shahr meñ kuchh raushnī dekho Thahar jaanā

is añdhere meñ jo thoḌī raushnī maujūd hai
dil meñ us kī yaad shāyad aaj bhī maujūd hai

ye raushnī kā shahr hai kaisā ki ab yahāñ
dekhā jise bhī nauha-kunāñ chāñdnī kā hai

maiñ apnī raah kī ḳhud raushnī banūñ to banūñ
koī ḳhudā hai na koī sanam hai mere liye

maiñ apne arsa-e-hastī kī DhūñDhtī thī asaas
tamām-umr bas ik aisī raushnī kī talāsh

sham.oñ meñ ab nahīñ hai vo pahlī sī raushnī
kyā vāqa.ī vo anjuman-ārā hai in dinoñ

Dūbtā huā sūraj de gayā sazā aisī
kho ga.ī añdheroñ meñ raushnī kī ḳhush-fahmī