Tags-Raushni

tire nikhre hue jalvoñ ne dī thī raushnī mujh ko
tire rañgīñ ishāroñ ne mujhe jiinā sikhāyā thā

pukārā hai kuchh aise naam merā
ragoñ meñ raushnī sī bah rahī hai

andher hai jo dam kī na is ke ho raushnī
yūsuf mirā charāġh hai bāzār ke liye

kisī be-mehr-sub.hoñ ko atā kī raushnī ham ne
ka.ī nā mehrbāñ rātoñ ko bhī ham mehrbāñ samjhe

raushnī ke qarīb jitnā huuñ
qad meñ utnā hī merā saaya hai

raushnī ke saudāgar har galī meñ aa pahuñche
zindagī kī kirnoñ ke āsmāñ pe bhaao haiñ

kaisā saaya thā ki gul kī us ne saarī raushnī
saath apne dhund kī dīvār tak vo le gayā

raushnī kā rañg jaise kuchh samajh aatā nahīñ
shahr kī tahzīb kā ruḳh kis taraf hai kyā pata

har taraf be-panāh tārīkī
apnī āñkhoñ kī raushnī hai faqat

raushnī meñ ek alag sī raushnī shāmil huī
aaj lagtā hai ki phir koī sar-e-mahfil jalā

raushnī kī ek nannhī sī lakīr
mere kamre ke añdhere kā badan

udaas lafzoñ ke rāste meñ ye raushnī kī lakīr kab thī
mohabbatoñ ke safar se pahle ġhazal kā lahja hī dūsrā thā

tumhāre ghar meñ abhī kitnī raushnī hogī
hamāre ghar se abhī tak dhuāñ nikaltā hai

jab ḳhushbūoñ ke dar pe huī raushnī to ham
gulshan ke har gulāb se aage chale ga.e

dhuup meñ Dhalān kam
raushnī meñ jaan kam

raushnī meñ kahīñ ugal degā
merā saaya nigal gayā hai mujhe

saaya nahīñ thā niiñd kā āñkhoñ meñ duur tak
bikhre the raushnī ke nagīñ āsmān par

maiñ apne band kamre meñ paḌā huuñ
ki raushnī bhī ujāloñ kī muntazir hai

maiñ āsmān ke saath phailī shaam kī nāranjī raushnī huuñ
yā sūraj kī aañkh meñ reñgtī surḳh dhār?

har ahl-e-anjuman kī zarūrat thī raushnī
maiñ sham-e-anjuman thā pighalnā paḌā mujhe