Tags-Raushni

mujhe ilm thā mujhe kam paḌegī ye raushnī
so maiñ inhisār charāġh par nahīñ kar sakā

kuchh aur tez ho ga.ī andar kī raushnī
ik pal bhī mil sakā na sukūñ aañkh phoḌ kar

raushnī chāhiye kuchh der zarā aur hameñ
chāñd ruk jaa.e yahīñ aur sitāre jaa.eñ

maiñ ne us kī raushnī meñ jis qadar nazmeñ kahīñ
in ko dīvāroñ pe likhnā hai mirā tum saath do

maiñ aa.ina hī nahīñ aks bhī huuñ lekin tū
vo raushnī hai jo dāman-kashāñ guzar jaa.e

tum na aa.e to bas huā itnā
kal charāġhoñ meñ raushnī kam thī

damak rahā huuñ abhī talak us ke dhyān se maiñ
bujhe hue ik ḳhayāl kī raushnī to dekho

is meñ bhī raushnī hai us meñ bhī raushnī thī
merā bhī hai vo siina muusā kā thā jo siina

zindagī tiira ġhaar ke mānind
aur maiñ raushnī kā shaidā.ī

jigar meñ haiñ dāġh-e-mahr-o-ulfat shigāf-e-pahlū hai jeb-e-mashriq
shab-e-lahad hai ki sub.h-e-mahshar ye kis qayāmat kī raushnī hai

der tak 'aḳhgar' dar-e-jāñ par charāġhoñ kī tarah
raushnī dete rahe merī jabīñ-sā.ī ke rañg

ye raqs kartī huī raushnī ke saa.e haiñ
ki haath kaañp rahe haiñ diyā jalāte hue

saḌak kī jagmagātī raushnī meñ ḳhauf lagtā hai
guzartā huuñ to mausam ke ishāre dekh letā huuñ

sham.a ko raushnī kā apne bahut da.avā hai
sāq-e-pā se kuchh uThā lījiye dāmāñ apnā

kuchh kaḌe Takrāo de jaatī hai aksar raushnī
juuñ chamak uThtī hai koī barq talvāroñ ke bech

maiñ harf harf meñ utrā huuñ raushnī kī tarah
so kā.enāt kā chehra nazar bhī aatā hai

shikasta ho ke bhī naumīd ho na dil terā
bujhe charāġh meñ bhī raushnī machaltī rahe

tīrgī meñ chhoḌ jā.eñge sabhī tujh ko magar
merī yādoñ kī faqat ik raushnī rah jā.egī

charāġh-e-rāhguzar laakh tābnāk sahī
jalā ke apnā diyā raushnī makān meñ lā

ta.āqub mat karo us ke badan kī raushnī kā
ki ye to sirf us kā isti.āra jā rahā hai