Tags-Raushni

laḌte rahe havā se jalāte rahe charāġh
ab aur raushnī ke talabgār kyā kareñ

ye añdheroñ ke hukmarāñ saare
aaj bhī raushnī se laḌte haiñ

halkī sī raushnī ke farishte haiñ ās-pās
palkoñ meñ buuñd buuñd jahāñ tak piro sake

kyā koī samjhe mire hālāt jab kahtā huuñ maiñ
ik musalsal raushnī ke saa.e meñ rahtā huuñ maiñ

raushnī meñ to nazar aate haiñ kitne saa.e
par ye tārīkī to saaya bhī judā kartī hai

jise zabān-e-ḳhirad meñ sharāb kahte haiñ
vo raushnī sī pilāo baḌā añdherā hai

rose ham ik añdherī dhund ke paar
qāfile raushnī ke dekhte haiñ

raushnī jis kī mirī āñkhoñ ko ḳhīra kar chukī hai
raakh kar ke chhoḌ degī ab harārat is badan kī

tārīkiyoñ ko oḌh ke sotī haiñ rāt-bhar
sūraj kī raushnī meñ nikhartī haiñ sīḌhiyāñ

dāġhoñ kī bas dikhā dī divālī meñ raushnī
ham sā na hogā koī jahāñ meñ divāliya

us kī tasvīr kyā lagī huī hai
puure kamre meñ raushnī huī hai

ye tum kis ke liye jalte ho goshoñ meñ
chalo chhat par saḌak tak raushnī jaa.e

shab-e-ġham añdherī hai kis qadar karūñ kaise sub.h kā maiñ safar
mire chāñd aa mirī le ḳhabar mujhe raushnī kā hisār de

jalā.ī tū ne agar na mash.al koī charāġh aur DhūñD leñge
jinheñ zarūrat hai raushnī kī kareñge vo intizār kab tak

māñge kī raushnī to koī raushnī nahīñ
is daur-e-musta.ār meñ apnā diyā to hai

kahāñ kho ga.ī ruuh kī raushnī
batā merī rātoñ ko āvārgī!

baḌī raushnī baḳhshte haiñ nazar ko
tere gesuoñ ke muqaddas añdhere

pahle hī kam thī qarya-e-jānāñ meñ raushnī
aur us pe kuchh charāġh bhī kam kar diye ga.e

tire diye kī raushnī ko DhūñDtā hai shaam se
mirā makāñ kisī luTe hue dayār kī tarah

tumhāre binā sab adhūre haiñ jānāñ
sabā phuul ḳhush-bū chaman raushnī rañg