Tags-Raushni

be-muqaddar chhoḌ jā.egā sabhī peshāniyāñ
raushnī āñkhoñ kī siine kī ziyā le jā.egā

shab-zadoñ ne raushnī māñgī to sūraj daf.atan
āsmānoñ se utar kar bastiyoñ meñ aa gayā

tīrgī ruuh tak chalī aa.ī
raushnī kā hisār kar dekheñ

mere lahū meñ us ne nayā rañg bhar diyā
sūraj kī raushnī ne baḌā kaam kar diyā

saarī nahīñ ye husn-e-mohammad kī raushnī
sūraj to un kā naqsh-e-kaf-e-pā dikhā.ī de

agar ye raushnī qalb o nazar se aa.ī hai
to phir shabīh-e-sitam-gar kidhar se aa.ī hai

raushnī le kar añdherī raat meñ niklā na kar
raat parde ke liye hai ḳhud ko be-pardā na kar

raushnī hogī to aa jā.egā rah-rav dil kā
us kī yādoñ ke diye taaq meñ har-sū rakkho

usī ke nuur se ye raushnī bachī huī thī
mire nasīb meñ jo tīrgī bachī huī thī

vo ek jhuuT thā jo raushnī meñ aa pahuñchā
ye ek sach hai añdheroñ meñ jo bhaTaktā hai

banā.eñ aisā makāñ ab ki chāñd aur sūraj
jidhar bhī jaa.eñ magar raushnī idhar hī rahe

sukūt TuuT gayā aur raushnī sī huī
sharār sañg se niklā ḳhudā ḳhudā kar ke

azal se hai ye do-ālam meñ raushnī jis kī
usī charāġh se ham lau lagā.e baiThe haiñ

zarā tārīkiyoñ ko bhī pukāro
ki itnī raushnī achchhī nahīñ hai

raushnī saañs hī le le to Thahar jaatā huuñ
ek jugnū bhī chamak jaa.e to Dar jaatā huuñ

mujhe jis ne merā patā diyā vo ġham-e-nihāñ mire saath hai
mirī zindagī mirī raushnī dil‌-be-amāñ mire saath hai

ik aarzū mujhe kyā kyā fareb detī hai
bujhe charāġh meñ bhī raushnī sī lagtī hai

sabhī sakhiyāñ gharoñ ko le ke gāgar jā chukīñ kab kī
darīchoñ se ab un ke raushnī rah rah ke chhantī hai

na kārvāñ na musāfir magar jaras na thamī
na raushnī na harārat magar jale ham log

apne aañsū 'amīr' kyuuñ poñchhūñ
in charāġhoñ meñ raushnī hai abhī