Tags-Raushni

taa.ir bhī yahāñ paidā haiñ kiye qudrat ne ajab gul-rañg-o-hāsīñ
gar zamzame un kī raushnī sun leñ yaad aa.e unhīñ firdaus-e-barīñ

kaisī ye raat hai ki havā bhī laraz uThī
kaisī ye raushnī ki sitāra bhī Dar gayā

vo jo shaam terī palak pe aa ke Thahr ga.ī
mirī raushnī kī hadoñ meñ lā ke bhī dekhnā

ham ne maanā har taraf tīra-shabī kā raaj hai
aap sūraj haiñ agar tū raushnī phailā.iye

yahīñ pe māthoñ kī raushnī jal ke bujh ga.ī hai
sapāT chehroñ ke ḳhālī panne khule hue haiñ

ehsās-e-tīrgī thā use raushnī ke ba.ad
is ḳhauf se charāġh kī lau kāñptī rahī

koī bazm ho koī anjuman ye shi.ār apnā qadīm hai
jahāñ raushnī kī kamī milī vahīñ ik charāġh jalā diyā

ghuTan to dil kī rahī qasr-e-marmarīñ meñ bhī
na raushnī se huā kuchh na kuchh havā se huā

jalte diyoñ meñ jalte gharoñ jaisī zau kahāñ
sarkār raushnī kā mazā ham se pūchhiye

har sitāre kī bujhtī huī raushnī
mere hone kā hai isti.ārā mujhe

ek bhī gaam chal na pā.egī
in añdheroñ meñ raushnī 'anjum'

usī ke nuur se pur-nūr thā ye saarā jahāñ
hamārī aañkh meñ jo raushnī bachī huī thī

usī ke nuur se ye raushnī bachī huī thī
mire nasīb meñ jo tīrgī bachī huī thī

jis dāstān-e-ġham kā unvān raushnī hai
har lafz kī siyāhī ḳhud muñh se boltī hai

ḳhvāboñ ke saath zehn kī añgḌā.iyāñ bhī haiñ
ik raushnī bhī hai ka.ī parchhā.iyāñ bhī haiñ

har qadam ḳhauf hai dahshat hai riyā-kārī hai
raushnī meñ bhī añdheroñ kā safar jaarī hai

nahīñ hai mere muqaddar meñ raushnī na sahī
ye khiḌkī kholo zarā sub.h kī havā hī lage

raushnī kī khoj meñ paltīñ zamīñ kī jab taheñ
kuchh lahū ke daaġh kuchh TuuTe hue ḳhanjar mile

hai sadaf gauhar se ḳhālī raushnī kyūñkar mile
aaj shāyad rāste meñ koī paiġhambar mile

ab aur dam na ghuTe raushnī kā kamre meñ
darīche vā hoñ ujāloñ kī dauḌ puurī ho