Tags-Raushni

raushnī ḳhāna-e-āshiq kī hai tujh se varna
tū na ho to shab-e-mahtāb kise bhātī hai

vahāñ milā bhī to apnā hī āshnā sā ye
khaḌe the der se ham raushnī ke raste meñ

ka.ī sarāb mile tishnagī ke raste meñ
rukāvaTeñ haiñ bahut raushnī ke raste meñ

tumhāre āñgan meñ raushnī ho
hamāre ghar meñ bhī zindagī ho

kamāl-e-lailā to dekho ki sirf naam liyā
''phir us ke ba.ad charāġhoñ meñ raushnī na rahī''

chalo lahū bhī charāġhoñ kī nazr kar deñge
ye shart hai ki vo phir raushnī ziyāda kareñ

vaqt kī sarkash havāo! jab diyā bujh jā.egā
sub.h kī sūrat meñ us kī raushnī rah jā.egī

ruuh ko to ik zarā sī raushnī darkār hai
jism ko lekin bahut kuchh aur bhī darkār hai

hairān mat ho tairtī machhlī ko dekh kar
paanī meñ raushnī ko utarte hue bhī dekh

zard sūraj kī mash.al bhī kajlā ga.ī chāñd tāroñ ko bhī niiñd sī aa ga.ī
ab kisī ko agar raushnī chāhiye apnī palkoñ pe sham.eñ jalā kar chale

tum falak par chāñd ban kar raushnī dete rahe
maiñ mahaktī sī tumhārī rāt-rānī rah ga.ī

jab se maiñ un ke halqa-e-bai.at meñ aa gayā
'nāyāb' ek raushnī fikr-o-nazar meñ hai

raat kī gahrī ḳhamoshī TimTimātī raushnī
ek maiñ tanhā musāfir dūsrī ḳhālī saḌak

matā-e-dard hai dil meñ to aañkh meñ aañsū
na raushnī kī kamī hai na raushnā.ī kī

ye hukm hai ki añdhere ko raushnī samjho
mile nasheb to koh-o-daman kī baat karo

barahna peḌoñ ke zāviyoñ meñ ghane añdhere uge haiñ lekin
inhī añdheroñ meñ raushnī kī ibārateñ bhī likhī huī haiñ

phūñk de baḌh ke jo tīrgī kā badan
merī āñkhoñ meñ vo raushnī hai kahāñ

siyāh-ḳhāna-e-dil meñ hai zulmatoñ kā hujūm
charāġh-e-shauq jalāo ki raushnī ho jaa.e

raushnī kyā paḌī hai kamre meñ
dhuul uḌne lagī hai kamre meñ

ik zarā sā tirā ḳhayāl aayā
raushnī ho ga.ī hai kamre meñ