Tags-Relationship

zindagī bhar kī kamā.ī ye ta.alluq hī to hai
kuchh bache yā na bache is ko bachā rakhte haiñ

vāda-e-tark-e-ta.alluq ne rulāyā hai bahut
aur ḳhush yuuñ huuñ ki va.ade se mukarnā hai abhī

phir vahī zauq-e-ta.alluq phir vahī kār-e-junūñ
sar meñ saudā hai to āshob-e-jahāñ kuchh bhī nahīñ

ye jaan kar bhī ta.alluq baḌhānā Thiik nahīñ
ki agle saal bichhaḌnā paḌegā donoñ ko

phir aise tark-e-ta.alluq kā fā.eda kyā hai
jab ek kamre meñ rahnā paḌegā donoñ ko

ta.āruf rog ho jaa.e to us kā bhūlnā behtar
ta.alluq bojh ban jaa.e to us ko toḌnā achchhā

tujh se ye kaisā ta.alluq hai jise jab chāhūñ
ḳhatm kar detā huuñ āġhāz bhī kar letā huuñ

ta.alluq toḌne meñ pahl mushkil marhala thā
chalo ham ne tumhārā bojh halkā kar diyā hai

maiñ bhī rasman ta.alluq nibhātā rahā
vo bhī aksar milā sochte sochte

had se baḌh kar mohabbat munāsib nahīñ is meñ andesha-e-bad-gumānī bhī hai
dushmanoñ se ta.alluq to hai hī ġhalat dostoñ meñ bhī kuchh fāsla chāhiye

maiñ ḳharāboñ kā makīñ aur ta.alluq merā
tere naate kabhī ḳhvāboñ ke mahallāt se thā

ka.abe se ta.alluq hai na but-ḳhāne kā ġham hai
hāsil mire sajdoñ kā tirā naqsh-e-qadam hai

ye ehsās-e-ta.alluq mujh ko miTne bhī nahīñ detā
ki terī dāstāñ kā rabt merī dāstāñ tak hai

bande kā aur ḳhudā kā ta.alluq hī miT chukā
patthar huī zabān munājāt kaise ho

ye ta.alluq bhī rahe yā na rahe
Dil-qalandar kā Thikānā hī nahīñ

log dariyāoñ pe kyuuñ jaan diye dete haiñ
tishnagī kā to ta.alluq hī nahīñ paanī se

ahbāb mujh se qat-e-ta.alluq kareñ 'jigar'
ab āftāb-e-zīst lab-e-bām aa gayā

ik ta.alluq sabhī se hai lekin
sab se jaa.ez ta.alluqāt nahīñ

maiñ ajnabī kī tarah tere paas se guzrā
ye kyā ta.alluq-e-ḳhātir hai kuchh ḳhayāl to kar

ta.alluq TūTne ko hai jahāñ se
chalo ki band-e-ġham TuuTe hue haiñ