Tags-Relationship

ik taraf tark-e-ta.alluq ik taraf hai us kī yaad
hai kahāñ āsāñ guzarnā aise tūfānoñ ke biich

hamāre un ke ta.alluq kā ab ye aalam hai
ki dostī kā hai kyā zikr dushmanī bhī nahīñ

mujhe ta.alluq-e-ḳhātir ho kyā zamāne se
kisī ke naam bhī ḳhat ho tirā patā likkhūñ

kal qat.a ta.alluq kar lenā is vaqt to duniyā merī hai
ye raat kī qasmeñ jhūTī haiñ ye raat kī niyyat Thiik nahīñ

maiñ chup khaḌā thā ta.alluq meñ iḳhtisār jo thā
usī ne baat banā.ī vo hoshiyār jo thā

be-rahm judā.ī kā sabab bhī nahīñ ma.alūm
ik-gūna ta.alluq kā bharam bhī nahīñ ab ke

jahāñ meñ bashar un se ho be-ta.alluq koī maan le ham na māneñge us ko
ki chāroñ taraf haiñ yahī chaar chīzeñ mohabbat adāvat bhalā.ī burā.ī

ga.e dinoñ kī tasvīroñ ke bujhte hue nuqūsh
taaza tark-e-ta.alluq ke sadmāt akelā kamra

bahut ehsāñ jatāne se ta.alluq TuuT jaatā hai
bahut īsār-o-qurbānī ke jazbe maar dete haiñ

ba-unvān-e-digar phir ham se qaa.em kar liyā tum ne
vo ik gahrā ta.alluq jis ko tark-e-dostī kahiye

ye ham jo ishq meñ bīmār paḌte rahte haiñ
ye ik sabab hai ta.alluq bahāl karne kā

ab us ko sochte haiñ aur hañste jaate haiñ
ki tere ġham se ta.alluq rahā hai kitnī der

tū koī ḳhvāb nahīñ jis se kinārā kar leñ
kyuuñ na pahle se ta.alluq pe guzārā kar leñ

vo shahr aaj bhī mere lahū meñ shāmil hai
vo jis se tark-e-ta.alluq ko ik zamānā huā

mujh se jab tark-e-ta.alluq kā kiyā ahd to phir
muḌ ke merī hī taraf aap ne dekhā kaise

mahfil mahfil apnā ta.alluq aaj hai ik mauzū-e-suḳhan
kal tak tark-e-ta.alluq ke bhī afsāne ban jā.eñge

ta.alluq un āñkhoñ se paidā huā hai
bahut din kā ye ḳhvāb dekhā huā hai

mirā aur un kā ta.alluq hai is tarah jaise
zabāñ dahan ke liye hai dahan zabāñ ke liye

banā hai mai-kada ahl-e-havas kī bazm ai saaqī
tirā tark-e-ta.alluq dekhnā jaane na kyā kar de

vo tark-e-pās-e-vafā hī thā dushmanī nahīñ thī
huzūr pās-e-ta.alluq to aaj bhī karūñgī