Tags-Relationship

be-mehr mausamoñ ko nahīñ jāntā abhī
ḳhush hai jo sā.ebāñ se ta.alluq bigāḌ ke

unheñ tark-e-ta.alluq hai jo manzūr
mujhe ilzām dete haiñ vo kyā kyā

tum ba-zāhir jo lā-ta.alluq ho
aur ham tum se darguzar kab tak

binā badan ke ta.alluq bachā nahīñ sakte
yahī jo rasta bachā hai to koī baat nahīñ

dard se koī ilāqa na ta.alluq ġham se
sirf lafzoñ ke baratne se ġhazal kaise ho

toḌnā hai jo ta.alluq to tazabzub kaisā
shāḳh-e-ehsās pe kyā baar banāyā huā hai

vo jin ko apne tark-e-ta.alluq pe naaz thā
aaj un ko yaad sohbat-e-yārāñ bhī aa.egī

kis tarah tark-e-ta.alluq kā maiñ sochūñ 'tābish'
haath ko kāTnā paḌtā hai chhuḌāne ke liye

na ābrū-e-ta.alluq hī jab rahī 'bānī'
baġhair baat kiye ham vahāñ se Talte kyā

mohabbat ne har ik se be-ta.alluq kar diyā mujh ko
tumhārī yaad bhī ab to barā.e naam aatī hai

saare kirdāroñ meñ be-rishta ta.alluq thā koī
un kī be-hoshī meñ ġham sā hosh aa jaane kā thā

ta.alluq ḳhaas hai dil ko ḳhayāl-e-rañj-o-rāhat se
kisī ko ham sharīk-e-ranj-o-rāhat kar nahīñ sakte

us ne an-dekhā an-sunā kar ke be-ta.alluq kiyā hai to ab ham
us kī tasvīr se nikāleñge āñsuoñ ke hisāb kī sūrat

ajiib us se ta.alluq hai kyā kahā jaa.e
kuchh aisī sulh nahīñ hai kuchh aisī jañg nahīñ

ab ḳhudā jaane tujhe bhī hai ta.alluq ki nahīñ
log lete haiñ mirā naam tire naam ke ba.ad

ta.alluq kirchiyoñ kī shakl meñ bikhrā to hai phir bhī
shikasta ā.īnoñ ko joḌ denā chāhte haiñ ham

nibhegā kaise ta.alluq samajh nahīñ aatā
anā kī Dor rakhī hai bahut mahīn us ne

kyā milā tark-e-ta.alluq se bhī mujh ko 'jāved'
yaad ne chhoḌā na ġham hī ne subuk-dosh kiyā

'nasīr' tark-e-ta.alluq hī un se behtar hai
vafā ke naam pe kab tak fareb khā.eñge