Tags-Relationship

kis ko 'tauqīr' ye ḳhabar hogī
kis ta.alluq se us ne luuTā hai

ujlat meñ na kar tark-e-ta.alluq kī shikāyat
dil terī taraf yaad to kar terī taraf thā

ham se vo tark-e-ta.alluq kar chuke
aur phir un kī mohabbat kam nahīñ

na pūchh marg-e-shanāsā.ī kā sabab kyā hai
kabhī hameñ thā ta.alluq sabhoñ se ab kyā hai

mubārak aġhyār se ta.alluq na.ī hai chāhat nayā ta.ashshuq
balā se ham ho ga.e tasadduq tumheñ ab is kā malāl kyā hai

be-ta.alluq bhī hai vo ham ne bhī hai ab tak 'zafar'
rābta joḌā huā TuuTe hue tāroñ ke saath

lag ga.ī thī maut kī apnī bhī chhoTī sī ḳhabar
āḳhir apnā bhī ta.alluq thā in aḳhbāroñ ke saath

us kā dushman se ta.alluq us kā dushman se milāp
sun rahā huuñ āj-kal jo kuchh ilāhī chhūT kar

haiñ bhiiḌ meñ bhī ham aaj tanhā ye ajnabiyyat kī DhūñDh kyā hai
uḌe dhueñ meñ na.e ta.alluq purāne rishte to log samjhe

ahbāb mujh se qat-e-ta.alluq kareñ 'jigar'
ab āftāb-e-zīst lab-e-bām aa gayā

tirī bazm se hai bas itnā ta.alluq
ki shāmil bhī huuñ aur shāmil nahīñ huuñ

unheñ azm-e-tark-e-ta.alluq mubārak
maiñ un ke irādoñ meñ haa.il nahīñ huuñ

ab toḌ takānoñ ke takalluf se ta.alluq
pazhmurda tabī.at ko phisalne kī duā de

sone se jāgne kā ta.alluq na thā koī
saḌkoñ pe apne ḳhvāb liye bhāgte rahe

tasavvur kī hadoñ se duur jā kar kaise dekheñge
agar tum se ta.alluq ġhā.ebāna bhī nahīñ hogā

manzileñ na bhūleñge rāh-rau bhaTakne se
shauq ko ta.alluq hī kab hai paañv thakne se

lafz kā bas hai ta.alluq mere tere darmiyāñ
lafz ke ma.anī pe qaa.em saare rishtoñ kā nishāñ

dil kī ābādī hai 'aḳhtar' dil kī barbādī kā naam
ik ta.alluq hai mirī hastī ko vīrānī ke saath

ajab rañg-e-ta.alluq hai mohabbat kā mire dil se
ki us ko toḌnā bhī aur sadā ke saath bhī rahnā

be-vaj.h ta.alluq koī be-nām rifāqat
jiine ke liye kam ye bahāne nahīñ hote