Tags-Relationship

vo be-ḳhudī thī mohabbat kī be-ruḳhī to na thī
pe us ko tark-e-ta.alluq ko ik bahāna huā

yādeñ mujhe na jurm-e-ta.alluq kī deñ sazā
merā koī na maiñ hī kisī kā aziiz thā

so is ta.alluq meñ jo ġhalat-fahmiyāñ thiiñ ab duur ho rahī haiñ
rukī huī gāḌiyoñ ke chalne kā vaqt hai dhuñdh chhaT rahī hai

tum ko 'kaifī' se ta.alluq to na hogā lekin
jān-pahchān mulāqāt shanāsā.ī hai

isī husn-e-ta.alluq par varaq likhte ga.e laakh
kiran se rū-e-gul tak ek pal kā rābta thā

mire un ke ta.alluq par koī ab kuchh nahīñ kahtā
ḳhudā kā shukr sab ke muñh meñ taale paḌte jaate haiñ

har ik ta.alluq shikast-mā.il
ravish ravish inqilāb sā kuchh

zamīñ se ta.alluq na rishta falak se
musībat hai goyā buland āshyiānī

charāġh sabr ke jis ne jalā.e royā hai
havā se rabt-o-ta.alluq baḌhā.e royā hai

ham bhī kuchh apnī vafāoñ pe hue the nādim
un ko bhī tark-e-ta.alluq pe pashemānī thī

bas ik ta.alluq-e-ḳhātir kā paas hai varna
to ḳhūb-rū sahī par itnā ḳhūb-rū bhī nahīñ

maiñ tark-e-ta.alluq pe bhī āmāda huuñ lekin
tū bhī to mirā qarz-e-ġham-e-hijr adā kar

in na.ī koñpaloñ se mirā kyā koī bhī ta.alluq na thā
shāḳh se toḌ kar ai sabā ḳhaak meñ kyuuñ milāyā mujhe

ta.alluq apnī jagah tujh se barqarār bhī hai
magar ye kyā ki tire qurb se farār bhī hai

maiñ ne kyuuñ tark-e-ta.alluq kī jasārat kī hai
tum agar ġhaur karoge to pashīmāñ hoge

ham se koī ta.alluq-e-ḳhātir to hai use
vo yaar bā-vafā na sahī bevafā to hai

us ke vādoñ se itnā to sābit huā us ko thoḌā sā pās-e-ta.alluq to hai
ye alag baat hai vo hai vāda-shikan ye bhī kuchh kam nahīñ us ne vaade kiye

jis qadar us se ta.alluq thā chalā jaatā hai
us kā kyā rañj ho jis kī kabhī ḳhvāhish nahīñ kī

in ashkoñ kā dil se kyā ta.alluq
ye sho.ale jigar se aa rahe haiñ

is zamīñ se ajab ta.alluq hai
zarre zarre se rishtedārī hai