Tags-Relationship

ye sochtā huuñ ki āḳhir vo maslahat kyā thī
ki jis se tark-e-ta.alluq kā ik bahāna huā

ye ta.alluq jo kiyā qat.a huā qissa tamām
ye na.ī dāstāñ kā nuqta-e-āġhāz nahīñ

hai tere zehn meñ tark-e-ta.alluq
tujhe phir ham sā koī mil gayā kyā

kanīz-e-hazrat-e-mushkil-kushā huuñ dil se maiñ 'parvīñ'
ta.alluq mujh ko āsānī se hai mushkil se kyā nisbat

ḳhudā ke fazl se ham haq pe haiñ bātil se kyā nisbat
hameñ tum se ta.alluq hai mah-e-kāmil se kyā nisbat

ik purānā sā rabt hai us se
ik ta.alluq hai ġhā.ebāna sā

azīm-tar hai mohabbat meñ ruuh kā rishta
magar badan kā ta.alluq bhī darmiyāñ niklā

ajnabī tujh se ta.alluq kā sila ḳhuub hai ye
terī ḳhvāhish hai ki har roz na.ī nazm likhūñ tere naam

apnā apnā samay batā rahe haiñ
ham ta.alluq kahāñ nibhā rahe haiñ

maiñ kināra bhī karūñ ḳhud se to mumkin hai kahāñ
ki na ho tere ta.alluq se ham-āġhoshī bhī

mausam kī her-pher ne sābit ye kar diyā
kuchh mere jism kā bhī ta.alluq makāñ se hai

yahī dil thā ki tarastā thā marāsim ke liye
ab yahī tark-e-ta.alluq ke bahāne māñge

ta.alluq kyā faqīrān-e-haram kā shahryāroñ se
ham aise log kab apnī vafādārī badalte haiñ

ta.alluq hai vahī tā-hāl un zulfoñ ke saude se
salāsil kī giraftārī jo aage thī so ab bhī hai

Thiik hai jaao ta.alluq na rakheñge ham bhī
tum bhī va.ada karo ab yaad nahīñ aaoge

vo din bhī haa.e kyā din the jab apnā bhī ta.alluq thā
dashahre se divālī se basantoñ se bahāroñ se

qat.a kar ke bhī ta.alluq vo kahāñ chain se hai
is ke asbāb-o-dalā.el bhī ginātā hai mujhe

hai kyā ajab ki tark-e-ta.alluq ke bāvajūd
chehre pe apne us kī nazar chāhtī huuñ maiñ

hai apnī zindagī jitnā purānā
ta.alluq aañkh se vīrāniyoñ kā

ta.ajjub hai ta.alluq yaad rakhnā aur phir ārām se sonā
agar us ko bhulā paa.e nahīñ ab tak saverā kaise karte ho