Tags-Relationship

ham se agar hai tark-e-ta.alluq to kyā huā
yaaro koī to un kī ḳhabar pūchhte chalo

jaise kabhī ta.alluq-e-ḳhātir na rahā
yuuñ ruuTh kar chalī ga.ī 'shohrat' har ek aas

jo baat tark-e-ta.alluq ke moḌ tak pahuñchī
ḳhatā tumhārī nahīñ thī ḳhatā hamārī thī

mujhe manzūr gar tark-e-ta'alluq hai razā terī
magar TūTegā rishta dard kā āhista āhista

har ta.alluq ko mohabbat se nibhā letā hai
dil hai yā koī adākār paḌā hai mujh meñ

ḳhānqāhoñ se ta.alluq hai na darbāroñ se
nisbat-e-silsila-e-zulf-e-butāñ rakhte haiñ

kab tak ga.e rishtoñ se nibhātā maiñ ta.alluq
is bojh ko ai dost utaar aayā huuñ sar se

kisī sitam meñ bhī ik raunaq-e-ta.alluq hai
vagarna yuuñ to maiñ tanhā.iyoñ meñ Dhaltā thā

tire visāl ke mausam meñ ustuvār huā
koī ajab sā ta.alluq jahān-e-fānī se

maiñ tere vasl kā lamha bachā sakūñ shāyad
mirā ta.alluq-e-ḳhātir hai rā.egānī se

kuchh be-nām ta.alluq jin ko naam achchhā sā dene meñ
maiñ to saarī bikhar ga.ī huuñ ghar ko ikaTThā rakhne meñ

aap sukh se haiñ tark-e-ta.alluq ke ba.ad
itnī jaldī na ye faisla kījiye

raas aatā hī nahīñ koī ta.alluq 'nāhīd'
dil-e-ḳhush-fahm magar maan meñ rakkhā huā hai

is hujūm meñ tujh ko kyā ḳhabar huī hogī
kis ko kyā ta.alluq thā tere āstāne se

ġhalat hai lā-ta.alluq haiñ chaman se
tumhāre phuul aur shabnam hamārī

kaisā girdāb thā vo tark-e-ta.alluq terā
kaam aayā na mire merā shanāvar honā

agarche tark-e-ta.alluq meñ bhūlnā behtar
magar maiñ phir bhī tumheñ yaad aanā chāhūñgī

saare rishte jhuuT haiñ saare ta.alluq par fareb
phir bhī sab qaa.em raheñ ye bad-duā kar aa.e haiñ

vasl aur hijr ke mā-bain khaḌā huuñ 'kāshif'
tai na ho paayā ta.alluq kabhī merā us kā

tujh se ye kaisā ta.alluq hai jise jab chāhūñ
ḳhatm kar detā huuñ āġhāz bhī kar letā huuñ