Tags-Relationship

tujh se yak go na ta.alluq mujhe ik umr se thā
zindagī tū ne hī baḌh kar mujhe rokā hotā

kuchh ajab us se ta.alluq hai ki us kī har baat
mauj-e-ḳhūñ ban ke mire sar se guzarnā chāhe

kasrat se kyā ta.alluq
vahdat parast huuñ maiñ

baḌhtā chalā jaatā hai zamāne se ta.alluq
ye silsila zanjīr-e-girāñ-bār na ho jaa.e

dekhtā rahtā huuñ chup-chāp guzarte bādal
ye ta.alluq bhī koī dhuup kī bārish to nahīñ

barā.e naam jo tum se koī ta.alluq thā
usī ke bojh se kañdhe jhukā.e jaate haiñ

jism se jaise ta.alluq nahīñ rahtā koī
beshtar dīda-e-hairān meñ aa jaatā huuñ

raat aur din ke kināroñ ke ta.alluq kī qasam
vaqt milte haiñ to milne kī duā kartā huuñ

maiñ ek aise zamāne meñ basnā chāhtā huuñ
zamāna jis kā ta.alluq azal abad se na ho

ek āvāz maiñ ne sunī thī abhī kaun bolā thā ye to ḳhabar hī nahīñ
ye ta.alluq zarūrī hai kis ne kahā vo bhī ḳhāmosh thā maiñ bhī ḳhāmosh thī

jaise dhartī kī kisī shai se ta.alluq hī nahīñ
ho gayā pyaar tirā bhī tire dāman kī tarah

maiñ sāhab-e-ḳhabar bhī nazar bhī junūñ bhī thā
jab tak rahā thā merā ta.alluq kitāb se

peḌ aur dil meñ koī ḳhaas ta.alluq hai
havā chalī aur āḳhirī pattā TuuT gayā

chalo kahīñ pe ta.alluq kī koī shakl to ho
kisī ke dil meñ kisī kī kamī ġhanīmat hai

ḳhud se bhī toḌ chukā huuñ maiñ ta.alluq apnā
ab mirī raah meñ haa.il koī dīvār nahīñ

jo merī ruuh meñ utrā huā hai
maiñ us se be-ta.alluq bhī rahā huuñ

kisī ta.alluq ke TūTne kā azaab donoñ ke dil par utrā
maiñ aks ban ke Thahar gayā thā vo ā.īne kī tarah se chup thā

kartā hai koī tark-e-ta.alluq bhī is tarah
mahrūm ho gayā huuñ payām-o-salām se

kiyā tark-e-ta.alluq tum ne behtar
magar us kā kahīñ charchā na karnā

ye mo.ajiza bhī ajab hai tire ta.alluq kā
jo log dushman-e-jāñ the vo mehrbān se haiñ