Tags-Rind

rind phailā.e haiñ chullū ko takalluf kaisā
sāqiyā Dhaal bhī de jaam ḳhudā-sāz aayā

tauba tauba kyā ġhazab saaqī kī ġhaflat ne kiyā
sab kī sūrat dekhtā huuñ riñd-e-be-zar kī tarah

aisoñ se tark-e-mai kā 'mubārak' savāl kyā
tauba kī tujh se rind-e-qadah-ḳhvār kyā kaheñ

hoñ riñd sar khulā bhī jo hove to Dar nahīñ
zāhid nahīñ ki mujh ko ho dastār kī talāsh

na jaane in dinoñ kyā ho gayā hai saaqī ko
nigāh-e-rind meñ husn-e-talab nahīñ paḌhtā

duḳhtar-e-raz to hai beTī sī tire uupar harām
riñd is rishte se saare tire dāmād haiñ shaiḳh

mīnā-e-mai imaam ho māmūm riñd hoñ
hasrat hai pāñch vaqt kī ho yuuñ adā namāz

itnī to ho bayān meñ vaa.iz shaguftagī
ham riñd sun ke qulqul-e-mīnā kaheñ jise

kis tarah hazrat-e-vā.iz ko ye samjhā.ūñ 'rashīd'
riñd kyā dekh liyā karte haiñ paimāne meñ

us kī āñkhoñ ne pukārā to gine tak na ga.e
riñd kitne hī ḳharābāt se bāhar nikle

vo riñd huuñ ki mujhe hatkaḌī se bai.at hai
milā hai gesū-e-jānāñ se silsila dil kā

riñd aape se jo bāhar haiñ to hoñ
tū na ho jaame se bāhar vaa.iz

raunaq gulshan jo vo riñd-e-sharābī ho gayā
phuul sāġhar ban gayā ġhuncha gulābī ho gayā

riñd bīmār rahā mohtasib-e-shar.a se tez
is qadar jald are pheñk ke sāġhar karvaT

bahār meñ jo mujhe riñd kah rahe haiñ 'azīz'
vo pārsā bhī kaheñge mujhe bahār ke ba.ad

abhī raat kuchh hai baaqī na uThā naqāb saaqī
tirā rind girte girte kahīñ phir sambhal na jaa.e

pārsā rind ho to saktā hai
rind kyuuñ pārsā nahīñ hotā

tumhīñ kaho rind o mohtasib meñ hai aaj shab kaun farq aisā
ye aa ke baiThe haiñ mai-kade meñ vo uTh ke aa.e haiñ mai-kade se

rind o āzād hue chhoḌ ilāqa sab kā
DhūñDhte kab haiñ pidar aur pisar kā takiya

ye ajiib mai-kada hai ki gumān-e-mai-kada hai
yahāñ riñd hosh meñ haiñ yahāñ fikr-e-besh-o-kam bhī