Tags-Ritual

mushkileñ rāh-e-vafā meñ bhī banā.īñ āsāñ
rasm-e-ulfat to ba-har-taur nibhā.ī ham ne

kyā rasm-e-iltifāt zamāne se uTh ga.ī
sab kī zabāñ par hai sitam-e-nā-ravā kī baat

rasm-o-rah-e-jahāñ kī sifārish rahī magar
phir bhī to aane paa.ī na ahl-e-vafā kī baat

rasm hī niiñd kī āñkhoñ se uThā dī ga.ī kyā
yā mire ḳhvāb kī ta.abīr batā dī ga.ī kyā

kuchh mile yā na mile apnī vafāoñ kā sila
dāman-e-rasm-e-vafā apnā baḌhāte chaliye

hamāre shahr meñ hotī na rasm-e-sañg-zanī
to canvas pe harī beriyāñ banāte ham

dekh aao marīz-e-furqat ko
rasm-e-duniyā bhī hai savāb bhī hai

kahāñ hai pīr-e-muġhāñ aur kahāñ hai muzda-e-hosh
ki tishna-lab rah-o-rasm-e-muġhāñ se ruuTh ga.e

ye dekh kar ki ġham-e-do-jahāñ hai rasm-e-jahāñ
jo ahl-e-ġham the ġham-e-do-jahāñ se ruuTh ga.e

jo tez-gām thā us ko sikhā.ī rasm-e-sulūk
jo sust-e-gām thā is kārvāñ se ruuTh ga.e

har baar hī maiñ jaan se jaane meñ rah gayā
maiñ rasm-e-zindagī jo nibhāne meñ rah gayā

rasm phir rasm hai Thahrā hai lahū hī jo suhāg
chamak ai teġh-e-havā le ye rahā sar apnā

jis se jab tak mile dil hī se mile dil jo badlā to fasāna badlā
rasm-e-duniyā ko nibhāne ke liye ham se rishtoñ kī tijārat na huī

nirāle haiñ rasm-o-rivāj-e-mohabbat
vahī paar hotā hai jo Duub jaa.e

bebasī sī ajab zindagī meñ ik aisī bhī aa.ī ki jab
ham ne chup-chāp hāthoñ ko rasm-e-hinā ke havāle kiyā

tark karnī thī har ik rasm-e-jahāñ
haañ magar rasm-e-vafā rakhnī hī thī

is mausam meñ gul-dānoñ kī rasm kahāñ hai
logo ab phūloñ ko ātish-dān meñ rakhnā

na.ī bārish kī rim-jhim meñ libās-e-ġham to badlegā
vahī rasm-e-chaman hogī magar mausam to badlegā

nā-mustajāb itnī duā.eñ huiiñ ki phir
merā yaqīñ bhī uTh gayā rasm-e-duā ke saath

ham jalāte rahe har-gām mohabbat ke charāġh
vo rah-o-rasm kī har sham.a bujhātā guzrā