Tags-Rukhsar

maiñ jin bahāroñ kī parvarish kar rahā huuñ zindān-e-ġham meñ hamdam
kisī ke gesū-o-chashm-o-ruḳhsār-o-lab kī rañgīñ hikāyateñ haiñ

apne hoñToñ par tabassum kar talāsh
vaqt ke ruḳhsār par aañsū na DhūñDh

so dekh kar tire ruḳhsār o lab yaqīñ aayā
ki phuul khilte haiñ gulzār ke alāva bhī

āñkhoñ meñ hai nashsha sā chhāyā ruḳhsār hue surḳhī maa.il
hoñToñ pe larazte haiñ armāñ pur-kaif harārat bātoñ meñ

āriz-e-tābāñ ke qul par bahr-e-daf-e-chashm-e-bad
ḳhāl-e-ruḳhsār-e-parī kā kaalā daanā chāhiye

ḳhaal ruḳhsār-e-munavvar kā dikhānā chāhiye
chāñd meñ ai mehr-vash dhabbā lagānā chāhiye

āb-o-gil hī kā karishma lab-o-ruḳhsār bhī haiñ
aisī kyā baat hai kyuuñ aap divāne hue haiñ

chashm o ruḳhsār ke azkār ko jaarī rakkho
pyaar ke naame ko doharāo ki kuchh raat kaTe

nā-tavānī se tire bīmār ke ruḳhsār par
sailī-e-dast-e-sitam aur sāya-e-mizhgāñ hai ek

us ke ruḳhsār se hotā huā lab tak pahuñchā
ashk to mashrab-e-añgūr huā jaatā hai

kuchh to hai vaise hī rañgīñ lab o ruḳhsār kī baat
aur kuchh ḳhūn-e-jigar ham bhī milā dete haiñ

phūTeñ vo āñkheñ nigāh-e-bad se jo dekheñ tujhe
ātishīñ ruḳhsār mijmar ḳhaal kaalā daana hai

huuñ vo be-ḳhud ki ye hai nāla-e-sozāñ pe gumāñ
sho.ala-e-ātish-e-ruḳhsār chale aate haiñ

apnī farhat ke din ai yaar chale aate haiñ
kaifiyat par gul-e-ruḳhsār chale aate haiñ

ho ke bāġhī aañkh se aañsū girā ruḳhsār par
sohbat-e-hijrāñ vahī dariyā huā achchhā huā

sab phūñk diye ḳhār-o-ḳhas-e-maz.hab-o-millat
allāh-re yak-sho.ala-e-ruḳhsār-e-mohabbat

ai tere sabza-e-ruḳhsār kī dil-āvezī
navāh-e-chashm se aañsū guzar ke dekhte haiñ

sahīfa-e-lab-o-ruḳhsār-o-pairahan us kā
tilāvatoñ meñ haiñ patte shajar ke dekhte haiñ

us ke ruḳhsār-e-shafaq-gūñ kī chamak
mere hoñToñ pe sajā de koī