Tags-Rural

dosto kyā pūchhte ho haal is ke gaañv kā
aa.ina lipTā huā tālāb kī kaa.ī meñ hai

ghanTiyāñ bajne se pahle shaam hone ke qarīb
chhoḌ jaatā maiñ tirā gaañv magar mere nasīb

ham se apne gaañv kī miTTī ke ghar chhīne ga.e
jis tarah shahrī parindoñ se shajar chhīne ga.e

gaañv meñ aa kar shahr base
gaañv bichāre jaa.eñ kidhar

gaañv chhoḌe ho chukī muddat magar
'ḳhāvar' ab tak ajnabī hai shahr meñ

vo koī shai apnī kho chukī thī vo DhūñDhtī us ko phir rahī thī
vo shahr shahr aur gaañv gaañv talāsh meñ dar-ba-dar ga.ī vo

ghoḌe banānā chhoḌ diye kumhāroñ ne
gaañv meñ Dūbne vaalī laḌkī ek hī thī

gul khilātī hai usī shaḳhs kī sāñsoñ kī mahak
jis ke gāvoñ meñ bahut aam sunahrī chiḌiyāñ

kis darja tilismī hai mire gaañv kā manzar
sūkhe hue har khet pe sabze kā gumāñ hai

bahut tanhā hai vo ūñchī havelī
mire gaañv ke in kachche gharoñ meñ

kab tak phirnā ġhāroñ aur guphāoñ meñ
aao vāpas lauT chaleñ ab gaañv meñ

ik aur khet pakkī saḌak ne nigal liyā
ik aur gaañv shahar kī vus.at meñ kho gayā

dauḌā ragoñ meñ ḳhuuñ kī tarah shor shahr kā
ḳhāmoshiyoñ ne chhīn liyā chain gaañv meñ

phir koī taaza gharauñdā kisī vīrāne meñ
gaañv ko shahr karo shahr ko vīrāna karo

gaañv kī rivāyat ko rakhā qā.em-o-dā.em
is shahr meñ har moḌ pe ik peḌ lagā kar

batā ai abr musāvāt kyuuñ nahīñ kartā
hamāre gaañv meñ barsāt kyuuñ nahīñ kartā

gaañv meñ ab gaañv jaisī baat bhī baaqī nahīñ
yaanī guzre vaqt kī sauġhāt bhī baaqī nahīñ

koī ḳhushbū javāñ hotī hai mere gaañv meñ jab bhī
havā yuuñ ruḳh badaltī hai havelī thaam letī hai

ye kis kā dil dukhā kar apne gaañv se maiñ niklā huuñ
galī har moḌ par merī kalā.ī thaam letī hai

kachche āñgan kā vo ghar vo bām-o-dar
gaañv kī pagDañDiyāñ vo rahguzar