Tags-Sabr

sabr kab tak raah paidā ho ki ai dil jaan jaa.e
ek Takkar maar kar sar phoḌ yā dīvār toḌ

zulm kī buniyād par us ne banāyā thā mahal
sabr kī bas ek hī Thokar se vo bhī Dhah gayā

ai ġham-e-jāñ tire ġham-ḳhvāroñ kā
sabr ab had se sivā pahuñchā hai

dil o jaan o jigar sabr o ḳhirad jo kuchh hai paas apne
ye sab kar deñge ham un par nisār āhista āhista

tire shauq meñ dil kī tabāhī huī tire zauq kī us pe gavāhī huī
koī dam bhī na lene diyā mujhe dam mujhe dushman-e-sabr-o-qarār kiyā

vo ek haath baḌhā.egā tujh ko pā legā
so dekh sabr kā elaan bhī ziyāda nahīñ

kījiye ab mire nibāh kī fikr
yaar sabr-e-gurez-pā kab tak

qudrat-e-sabr āqibat kitnī
jur.at-e-tāqat-āzmā kab tak

vaqār-e-sabr khoyā girya-hā-e-be-qarārī ne
kahīñ ai e'tibār-e-chashm-e-nam aisā bhī hotā hai

sadme diye to sabr kī daulat bhī degā vo
kis chiiz kī kamī hai saḳhī ke ḳhazāne meñ

pahle bhī jis pe mire sabr kī had ḳhatm huī
tū ne kar dī nā vahī baat dobāra mire dost

diloñ pe dard kā imkān bhī ziyāda nahīñ
vo sabr hai abhī nuqsān bhī ziyāda nahīñ

dil gayā hosh gayā sabr gayā jī bhī gayā
shaġhl meñ ġham ke tire ham se gayā kyā kyā kuchh

hazār aish sahī zindagī ke dāman meñ
magar hai sabr kahāñ aadmī ke dāman meñ

fishār-e-zabt se rukne lagī hai saañs mirī
muqābla hai kisī sabr-āzmā ke saath

shukr shāne kā karūñ yā sabr ko DhūñDūñ kahīñ
zulf to simTī magar haañ dil pareshāñ ho gayā

sabr har baar iḳhtiyār kiyā
ham se hotā nahīñ hazār kiyā

tum jaate ho to jaao ḳhudā ke liye magar
le jaao apne saath na sabr-o-qarār ko

maiñ vo sabr-e-samīm huuñ jis ne
bār-e-amānat sar pe liyā thā

hosh-o-ḳhirad-o-sabr-o-tavāñ uTh chale ik ek
jaate hī tire chaal paḌī dil ke nagar meñ