Tags-Sabr

na zabt se shikva lab tak aayā na sabr ne aah khīñchne dī
rahā dahan meñ vo qufl ban kar girāyā chhātī pe sañg ho kar

sabr aayā hai hameñ ashk-fishānī se hī
mil hī jaa.e koī us ko bhī bahāna shāyad

hameñ sabr karne ko kah to rahe ho
magar dekh lo ḳhud hī ghabrā rahe ho

palkoñ kī had ko toḌ ke dāman pe aa girā
ik ashk mere sabr kī tauhīn kar gayā

maiñ kahā sabr o dil o diiñ ne vafā ham se na kī
be-vafā tū to vafā kar to lagā kahne ''ūñ-hūñ''

'jauhar' vo sabr aap hī degā agar hameñ
hai imtiyāz-e-vāda sabr-āzmā-e-dost

yahīñ pe manzil kareñge raahī yahīñ pe sab qāfile rukeñge
Thahar zarā shauq-e-sabr dushman ye dard be-iḳhtiyār kyā hai

mire husn-e-azmat-e-sabr-o-zabt ke naam haiñ
mujhe jo bhī pahuñchīñ aziyyateñ mirī aal se

jab huuk uThegī taḌpegā insāf na chhoḌo dil hī to hai
nā-chand thakan kā sabr-o-sukūñ bismil āḳhir bismil hī to hai

hairāñ huuñ ki phir us ne na kī sabr kī tākīd
baazū jo mirā bāzu-e-dildār meñ aayā

nāla-kash misl-e-jaras kyuuñ hai abas ai majnūñ
sabr kar aa.egī jammāza-savār aap se aap

usī kā dāḳhila is dasht meñ karo ab se
jo sabr pī sake apnā ġhubār khā jaa.e

tishnagī aisī ki dariyā kā lahū pī kar bhī
sabr ke qarz mukāfāt pe rah jaate haiñ

vo to kahte haiñ sabr kar chande
aur yahāñ sabr kar nahīñ aatā

koī dil kī niklī na aarzū huā ranj-o-ġham se jigar lahū
phire ḳhaak chhānte kū-ba-kū na to sabr hai na qarār hai

ye zabt sabr tabassum hue haiñ chaak sabhī
maiñ saḳht jaan huuñ lekin ye jaan niklegī

aas hotī to is sahāre par
sabr mumkin na thā magar karte

betābiyoñ ko sauñp na denā kahīñ mujhe
ai sabr maiñ ne aan ke lī hai tirī panāh

nahiñ asar kartā sabr kā marham
dil-e-āshiq meñ zaḳhm kaarī hai

barbād na jā.egī 'zahīr' apnī musībat
āḳhir to kahīñ sabr paḌegā mire dil kā