Tags-Sabr

dāman meñ āñsuoñ kā zaḳhīra na kar abhī
ye sabr kā maqām hai girya na kar abhī

us galī ne ye sun ke sabr kiyā
jaane vaale yahāñ ke the hī nahīñ

denā hai imtihān tumhāre firāq kā
ab sabr kā nisāb zarūrī sā ho gayā

merī aur us shoḳh kī sāhib-salāmat jo huī
sabr o tāqat ne kahā lo ham ne to mujrā kiyā

adā ke tausan par us sanam ko jo aaj ham ne savār dekhā
to hilte hī Tuk inaañ ke kyā kyā kuchalte sabr-o-qarār dekhā

jaane de sabr o qarār o hosh ko
tū kahāñ ai be-qarārī jā.egī

sabr kartī hī rahī be-chārgī
zulm hotā hī rahā mazlūm par

zabt-e-betābī-e-dil kī nahīñ tāqat baaqī
koh-e-sabr ab ye sadā detā hai Tal jā.ūñgā

dard niklā hai sabr kī had se
ashk nikle qatār se bāhar

haañ dard-e-ishq un pe karam kī nazar rahe
sabr o qarār tere havāle hue to haiñ

tasallī huā sabr se kuchh maiñ tujh bin
kabhī ye qayāmat trahdār hogā

terā vo jaur ye mirā sabr
insāf se Tuk nigāh karnā

ḳhushī meñ bhī mohabbat dushman-e-sabr-o-sakūñ niklī
rahā dil meñ vahī ik iztirāb avval se āḳhir tak

suḳhan-e-haq ko fazīlat nahīñ milne vaalī
sabr par dād-e-shujā.at nahīñ milne vaalī

koī paimān-e-vafā sabr se bhar jaatā hai
chār-o-nā-chār kī dahshat meñ guzar jaatā hai

judā.ī itnī zarūrī hai jitnī tum chāho
hamāre vāste sabr-o-razā zarūrī hai

are-o jīte-jī dard-e-judā.ī dene vaale sun
tujhe ham sabr kar lete agar mar ke judā hotā

tamām jabr-o-tashaddud kī had bhī ḳhatm huī
ki jab se sabr ko mehvar banā diyā ham ne

aa rahā hai kyuuñ kisī kā naam hoñToñ tak mire
ai dil-e-muztar tujhe sabr-āzmā samjhā thā maiñ

chhoḌā na dil meñ sabr na ārām ne qarār
terī nigah ne saaf kiyā ghar ke ghar pe haath