Tags-Sad

zindagī se hasīñ udāsī hai
ye mirī ham-nashīñ udāsī hai

parbatoñ vādiyoñ meñ bastī hai
jañgaloñ kī makīñ udāsī hai

diip bīm-o-rajā kā jaañ gul ho
dekhnā tum vahīñ udāsī hai

ka.aba-e-dil meñ hai jo mahv-e-tavāf
jahāñ tāb-e-jabīñ udāsī hai

jāda-o-sañg-mīl-o-maskan meñ
rahbaroñ kā yaqīñ udāsī hai

jur.a jur.a pilā mujhe saaqī
man hiran sātgīñ udāsī hai

sun adam se vajūd tak har jā
ḳhānumāñ meñ makīñ udāsī hai

vaañ ḳhushī kī numū muhāl sī hai
us ke dil kī zamīñ udāsī hai

lahza lahza use kashīd karo
ki mai-e-añgbīñ udāsī hai

dekh kar lā rahī hai hastī meñ
jān-e-jāñ jā-guzīñ udāsī hai

jauhar-e-hast mirzā-'ġhālib' thī
aaj ḳhāk-e-barīñ udāsī hai

kab se pindār meñ muqayyad hai
kaisī parda-nashīñ udāsī hai

vo tah-e-āb jal-parī sī hai
merī sahrā-nashīñ udāsī hai

na saaqī na botal na hai raqs-e-sāġhar udāsī hai chhā.ī huī anjuman par
fanā-sāzoñ dil se ġhazal aisī chheḌo 'fanā' naach uThe zindagī jhuum jaa.e

udāsī jhuk ke milte ho nigah se qatl karte ho
sitam-ījād ho nāvak lagāte ho kamāñ ho kar

ai ajnabī na pūchh udāsī kā mājrā
vo log kho ga.e haiñ jo bastī kī jaan the

har ik jism ghāyal har ik ruuh pyāsī
nigāhoñ meñ uljhan diloñ meñ udāsī

gayā to apnī udāsī bhī de gayā mujh ko
tamām din jo mire saath hañstā rahtā thā

mai-kade kī is udāsī se pata lagtā hai
tishna-lab uTh gayā shāyad koī maiḳhāne se

udāsī us kī ḳhanjar sī chubhe hai
mujhe kuchh yuuñ satāne lag gayā hai